சுவிட்சர்லாந்து உணவகங்களில் டிப் கொடுப்பதை நீங்கள் விரும்புகிறீர்களா.?

சுவிட்சர்லாந்தில் உணவகங்களில் டிப் (tips) கொடுப்பது என்பது ஊழியர்களின் வருமானத்தில் முக்கியப் பங்கு வகிக்கிறது. சமீபத்தில் வெளியான ஒரு ஆய்வின்படி, 60 சதவீதத்துக்கும் அதிகமான விருந்தினர்கள் வழக்கமாகவோ அல்லது எப்போதுமோ டிப் கொடுப்பதாகத் தெரிவித்துள்ளனர். இந்த ஆய்வை (Bank Cler) பேங்க் க்ளெர் மற்றும் ZHAW மேனேஜ்மென்ட் அண்ட் Law பள்ளி இணைந்து நடத்தியது.

சுவிட்சர்லாந்தின் உணவகத் துறையில் டிப் பகிர்வு முறை குறித்து விரிவான தகவல்களை இது வெளிப்படுத்தியுள்ளது, இது இந்தியாவில் உள்ள உணவகங்களில் டிப் கொடுக்கும் பழக்கத்துடன் ஒப்பிடும்போது வேறுபாடுகளை காட்டுகிறது, அங்கு டிப் பெரும்பாலும் தனிப்பட்ட சேவைக்கு மட்டுமே கொடுக்கப்படுகிறது.

ஆய்வின்படி, சுவிட்சர்லாந்தின் பாதிக்கும் மேற்பட்ட உணவகங்களில் டிப் தொகை சேவை ஊழியர்களுக்கும் சமையல் ஊழியர்களுக்கும் குறிப்பிட்ட விகிதத்தில் பகிர்ந்தளிக்கப்படுகிறது. உணவகங்களில் சுமார் பாதி, சேவை ஊழியர்கள் 80 சதவீதம் அல்லது அதற்கு மேல் பெறுகின்றனர். ஐந்தில் ஒரு உணவகத்தில் டிப் சமமாக சேவை மற்றும் பிற பிரிவுகளுக்கு பிரிக்கப்படுகிறது. சமையல் ஊழியர்களில் பெரும்பாலானோர் 50-50 விகிதத்தில் பகிர்வதை சரியானதாகக் கருதுகின்றனர், அதேசமயம் சேவை ஊழியர்களுக்கு சாதகமாக 70-30 விகிதம் அதிகம் விருப்பமளிக்கிறது.

உணவக ஊழியர்களில் கிட்டத்தட்ட மூன்றில் இரண்டு பங்கினர் தங்கள் நிறுவனத்தில் டிப் பகிர்வு முறையை குறைந்தபட்சம் ‘நியாயமானது’ என்று கருதுகின்றனர். சேவை ஊழியர்கள் இந்த முறையை அதிகம் பாராட்டுகின்றனர், ஆனால் சமையல் ஊழியர்கள் சற்று விமர்சனமாகவே உள்ளனர். உணவகத் தொழிலில் டிப் என்பது பல ஊழியர்களுக்கு அத்தியாவசிய வருமானமாக உள்ளது. சேவை ஊழியர்களில் 36.4 சதவீதமும், சமையல் ஊழியர்களில் 27.8 சதவீதமும் டிப் இல்லாமல் தங்கள் வருமானம் போதுமானதாக இருக்காது என்று கூறியுள்ளனர்.

விருந்தினர்களின் கருத்துப்படி, பத்தில் ஒன்பது பேர் தங்களை நேரடியாக சேவை செய்தவர்களுக்கு டிப் கொடுக்க விரும்புகின்றனர். ஆனால் இவர்களில் 40 சதவீதம் மட்டுமே அந்தத் தொகையை முழுமையாக அவர்களுக்கே கொடுக்க விருப்பம் தெரிவித்துள்ளனர். (Bank Cler) பேங்க் க்ளெர் தகவலின்படி, பாதிக்கும் மேற்பட்ட விருந்தினர்கள் சமையல் ஊழியர்களுக்கும் கூடுதல் டிப் வழங்க வேண்டும் என்று கருதுகின்றனர்.

ஜெர்மன் மொழி பேசும் சுவிட்சர்லாந்து பகுதியில் டிப் கொடுப்பது அதிகம் உள்ளது. அங்கு மூன்றில் இரண்டு பங்கு விருந்தினர்கள் வழக்கமாகவோ அல்லது எப்போதுமோ டிப் கொடுக்கின்றனர். இத்தாலிய மொழி பேசும் பகுதியில் இது 29 சதவீதமாகவும், பிரெஞ்சு மொழி பேசும் பகுதியில் 60 சதவீதமாகவும் உள்ளது. சுவிட்சர்லாந்து முழுவதும் சுமார் 17 சதவீதம் பேர் அரிதாகவோ அல்லது ஒருபோதும் டிப் கொடுப்பதில்லை. இதற்கு முக்கிய காரணம் பொருளாதாரம் – உணவு விலை ஏற்கெனவே அதிகமாக உள்ளது அல்லது குறைந்த வருமானம் காரணமாக பணம் மிச்சமில்லை என்று கூறுகின்றனர்.

ஆய்வின்படி, மூன்றில் ஒரு பங்கு விருந்தினர்கள் சுமார் 5 சதவீதம் டிப் கொடுக்கின்றனர். 28 சதவீதம் பேர் 10 சதவீதம் கொடுக்கின்றனர். கால் பங்கு பேர் சூழ்நிலைக்கு ஏற்ப முடிவு செய்கின்றனர். ஜெர்மன் மொழி பகுதியில் பெரும்பாலானோர் 10 சதவீதம் கொடுக்க, பிரெஞ்சு மற்றும் இத்தாலிய பகுதிகளில் 5 சதவீதம் அதிகம்.

இந்த ஆய்வு ஏப்ரல் 8 முதல் 30, 2025 வரை உணவக ஊழியர்களிடம் ஆன்லைனில் நடத்தப்பட்டது. ஜெர்மன் மொழி பேசும் நகர்ப்புறங்களில் இருந்து 100க்கும் மேற்பட்ட தரவுகள் சேகரிக்கப்பட்டன. அதேபோல், ஏப்ரல் 2025இல் 18 முதல் 81 வயது வரையிலான 1,000 பேர் ஜெர்மன், பிரெஞ்சு, இத்தாலிய மொழி பகுதிகளில் இருந்து ஆன்லைனில் கலந்துகொண்டனர். இந்த ஆய்வு சுவிட்சர்லாந்தின் உணவகத் துறையில் டிப் முறையை மேம்படுத்த உதவும் என்று எதிர்பார்க்கப்படுகிறது.

சுவிட்சர்லாந்தில் வசிக்கும் தமிழர்களான நீங்கள் உணவகங்களுக்கு செல்லும்போது டிப் கொடுப்பதை எந்த அளவுக்கு விரும்புகிறீர்கள் என்பதை காமண்டில் பகிருங்கள்.