ஆர்காவ் கன்டோனில் இளைஞர் கும்பல் மீது வழக்கு

ஆர்காவ் கன்டோனில் ஐந்து இளம் சுவிஸ் குடிமக்களைக் கொண்ட ஒரு கும்பல் நீதிமன்றத்தில் விசாரணைக்கு உள்ளாகியுள்ளது. இவர்கள் தற்போது 19 முதல் 20 வயதுடையவர்கள். இவர்களின் வாட்ஸ்அப் குழுவின் பெயர் “வுல்ஃப்ஸ்ரூடல்” (Wolfsrudel) என்பதாகும். இவர்களில் இருவர் தொழிற்பயிற்சி பெற்றவர்கள், மேலும் பலர் பொழுதுபோக்காக துப்பாக்கி சுடுதல் பயிற்சி செய்பவர்கள் என  சுவிட்சர்லாந்தின் பத்திரிகை ஒன்று தெரிவிக்கிறது. இவர்களின் குற்றங்களின் தன்மையும், குற்றம் சாட்டப்பட்டவர்களின் பின்னணியும் பொதுமக்களிடையே அதிர்ச்சியையும் குழப்பத்தையும் ஏற்படுத்தியுள்ளது.

சேதப்படுத்தல் முதல் சைபர் தாக்குதல்கள் வரை

இளைஞர்கள் மீது அரசு வழக்கறிஞர் பல குற்றச்சாட்டுகளை முன்வைத்துள்ளார். ரயிலை தடம்புரளச் செய்ய முயற்சித்தது குறித்து குற்றச்சாட்டு எழுந்துள்ளது. இவர்கள் இராணுவ கிடங்குகளிலும், வணிக கட்டடங்களிலும் உடைத்து நுழைந்து மதிப்புமிக்க பொருட்கள், டேட்டா சேமிப்பு கருவிகள் மற்றும் ஒரு கலாஷ்னிகோவ் தாக்குதல் துப்பாக்கியை திருடியுள்ளனர்.

மேலும், நிறுவனங்களை சைபர் தாக்குதல்கள் மூலம் மிரட்டி பணம் பறித்துள்ளனர். கண்ணாடி இழை கம்பிகளை (Glasfaserkabel) வெட்டி இணையம் மற்றும் தொலைபேசி இணைப்புகளை முடக்கியுள்ளனர். போலி அடையாள அட்டைகளை உருவாக்கியதோடு, கட்டடங்களுக்கு தீ வைத்துள்ளனர். கூடுதலாக, குழந்தை ஆபாச உள்ளடக்கங்களை இணையத்தில் விற்க முயற்சித்ததாகவும் குற்றச்சாட்டு உள்ளது.

மொத்தமாக, பிப்ரவரி 2022 முதல் மே 2024 வரையிலான காலகட்டத்தில் 40-க்கும் மேற்பட்ட குற்றங்களை இந்தக் கும்பல் செய்ததாக அரசு வழக்கறிஞர் தெரிவிக்கிறார். இருப்பினும், இவர்கள் மீதான குற்றச்சாட்டுகள் நிரூபிக்கப்படும் வரை இவர்கள் குற்றமற்றவர்களாகவே கருதப்படுவர்.

குற்றங்களுக்கான காரணம்: குழு உளவியல்

இந்த இளைஞர்களின் குற்றங்களுக்குப் பின்னால் உள்ள நோக்கம் இன்னும் விசாரணையில் உள்ளது. ஒரு கட்டடத்தில் உடைத்து நுழைந்த பிறகு,  தகாத வார்த்தைகள் மற்றும் “88” போன்ற எழுத்துக்கள் சுவர்களில் காணப்பட்டாலும், இந்தக் குற்றங்களுக்கு அரசியல் அல்லது தீவிரவாத நோக்கங்கள் இல்லை என விசாரணை அதிகாரிகள் முடிவு செய்துள்ளனர். அதற்கு பதிலாக, இந்தக் குற்றங்கள் “தன்னைத்தானே வலுப்படுத்தும் குழு உளவியல்”  காரணமாக நிகழ்ந்திருக்கலாம் என அரசு வழக்கறிஞர் கருதுகிறார்.