ஆர்காவ் கன்டோனில் அஞ்சல் நிலையத்தில் துணிச்சலான கொள்ளை; சைக்கிளில் தப்பிய மர்ம நபர்

ஸ்விட்சர்லாந்தின் ஆர்காவ் கன்டோனில் உள்ள மூரி (Muri, Aargau) நகரில் புதன்கிழமை பிற்பகலில் நடைபெற்ற கொள்ளைச் சம்பவம், அந்தப் பகுதியில் பரபரப்பை ஏற்படுத்தியுள்ளது. 2026 ஜனவரி 28ஆம் தேதி மாலை 4.30 மணிக்கு சற்றுமுன், மூரி அஞ்சல் நிலையம் (Postfiliale) ஒரு கொள்ளைச் சம்பவத்தின் மையமாக மாறியது.

முகமூடி அணிந்த அடையாளம் தெரியாத ஒருவர், அஞ்சல் நிலையத்தின் சேவை நுழைவாயில் வழியாக உள்ளே நுழைந்துள்ளார். அங்கு பணியாற்றிய பெண் ஊழியரிடம் பணத்தை ஒப்படைக்குமாறு மிரட்டியுள்ளார். அச்சமயம், தனது  ஜாக்கெட்டின் வயிற்றுப் பையில் ஒரு கையை வைத்திருந்ததாக கூறப்படுகிறது. அவர் ஆயுதம் வைத்திருந்தாரா என்பது தெளிவாக தெரியவில்லை.

பணத்தை கைப்பற்றிய பின்னர், அவர் பல ஆயிரம் ஸ்விஸ் ஃப்ராங்குகளுடன் ஒரு சைக்கிளில் ஏறி, தெரியாத திசையில் தப்பிச் சென்றுள்ளார். இந்த சம்பவத்தில் எவருக்கும் காயம் ஏற்படவில்லை என்பது குறிப்பிடத்தக்கது.

தகவல் கிடைத்தவுடன், பல போலீஸ் ரோந்து குழுக்கள் உடனடியாக தேடுதல் நடவடிக்கையில் ஈடுபட்ட போதிலும், சந்தேக நபர் யாருக்கும் தெரியாமல் தப்பியுள்ளார். இதையடுத்து, Kantonspolizei Aargau சம்பவம் தொடர்பான விசாரணையை தொடங்கியுள்ளது.

கொள்ளையன் சுமார் 175 சென்டிமீட்டர் உயரமும், 35 முதல் 40 வயதுக்குட்பட்டவராகவும் இருக்கலாம் என போலீசார் தெரிவித்துள்ளனர். அவர் பயன்படுத்திய சைக்கிள் கருமை நிறமாகவும், பின்புறம் சாமான்கள் வைக்க கூடிய கேரியரும், மண் தடுப்புகளும் (mudguards) கொண்டதாகவும் விவரிக்கப்பட்டுள்ளது.

இந்த கொள்ளைச் சம்பவம் குறித்து தகவல் அறிந்தவர்கள் அல்லது சந்தேகத்திற்கிடமான எதையாவது கண்டவர்கள், ஆர்காவ் கன்டோனல் போலீசாரை தொடர்பு கொள்ளுமாறு கேட்டுக்கொள்ளப்பட்டுள்ளது. சம்பவம் தொடர்பான விசாரணை தீவிரமாக தொடர்கிறது.

© Kapo AG