போலி போலீசாராக நடித்து கொள்ளை: இருவர் கைது

சூரிக் கன்டோனல் காவல் துறை (Kantonspolizei Zürich) மற்றும் சூரிக் கன்டோனின் இரண்டாம் நிலை அரசுத் தரப்பு வழக்கறிஞர் அலுவலகம் (Staatsanwaltschaft II), போலி போலீசாராக நடித்து கொள்ளை நடத்தியதாக சந்தேகிக்கப்படும் இரு நபர்களை அடையாளம் கண்டு, ஃப்ரைபுர்க் கன்டோனல் காவல் துறை (Kantonspolizei Freiburg) உதவியுடன் கைது செய்துள்ளன.

இந்த இருவரும், சூரிக் கன்டோனில் உள்ள நெடுஞ்சாலை ஓய்விடங்களில் கார் வியாபாரிகளை இலக்காகக் கொண்டு நடத்தப்பட்ட தாக்குதல் மற்றும் கொள்ளை சம்பவங்களில் ஈடுபட்டிருக்கலாம் என சந்தேகிக்கப்படுகிறது.

2025 ஏப்ரல் மாத இறுதியில், சீஉசாக் (Seuzach) மாநகரப் பகுதியில் உள்ள ஃபோரென்பெர்க் நோர்ட் (Forrenberg Nord) ஓய்விடத்தில், நள்ளிரவு நேரத்தில் பலர் கொண்ட குழு ஒன்று பல்கேரிய கார் வியாபாரியிடம் தங்களை போலீசார் என அறிமுகப்படுத்தியுள்ளது. போலியான காவல் சோதனை என்ற பெயரில் அவரிடம் இருந்த பணத்தை காண்பிக்கச் சொல்லி, பின்னர் அந்த பணத்துடன் தப்பிச் சென்றுள்ளனர்.

இதனைத் தொடர்ந்து, 2025 மே மாத தொடக்கத்தில், ஆஃபொல்டெர்ன் ஆம் ஆல்பிஸ் (Affoltern am Albis) மாநகரப் பகுதியில் உள்ள மைஸ்டாப் சூட் (MyStop Süd) ஓய்விடத்தில், இதேபோன்ற மற்றொரு சம்பவம் நள்ளிரவில் நடந்துள்ளது. இம்முறை மூன்று உக்ரைனிய கார் வியாபாரிகள் பாதிக்கப்பட்டுள்ளனர்.

திருட்டுக்குப் பிறகு குற்றவாளிகள் தங்கள் தப்பிச் செல்லும் வாகனத்தில் ஏறியபோது, பாதிக்கப்பட்டவர்களில் ஒருவர் அவர்களைத் தடுக்க முயன்றுள்ளார். அதன்போது குற்றவாளிகள் அவரை தாக்கி, சில மீட்டர் தூரம் வாகனத்துடன் இழுத்துச் சென்றுள்ளனர். இதில் அந்த நபருக்கு காயங்கள் ஏற்பட்டதாக காவல் துறை தெரிவித்துள்ளது.

இந்த சம்பவங்களுக்குப் பிறகு, சூரிக் கன்டோனல் காவல் துறையும் சூரிக் கன்டோனின் அரசுத் தரப்பு வழக்கறிஞர் அலுவலகமும் பல மாதங்கள் தீவிரமான மற்றும் விரிவான விசாரணைகளை மேற்கொண்டன. அதன் முடிவில், பல சந்தேக நபர்களில் ஃப்ரைபுர்க் கன்டோனில் வசித்து வந்த இரு ஆண்கள் அடையாளம் காணப்பட்டனர்.

2025ஆம் ஆண்டின் இறுதியில், ஃப்ரைபுர்க் கன்டோனல் காவல் துறை, சூரிக் சட்ட அமலாக்க அமைப்புகளுடன் இணைந்து, 35 வயதுடைய ருமேனிய குடிமகன் ஒருவரையும், 42 வயதுடைய சுவிஸ் குடிமகன் ஒருவரையும் கைது செய்தது. இந்த இருவரும் 2025 வசந்த காலத்தில் நடந்த இரண்டு கொள்ளை சம்பவங்களிலும், வெவ்வேறு குழு அமைப்புகளில் ஈடுபட்டிருந்ததாக சந்தேகிக்கப்படுகிறது.

சூரிக் கன்டோனின் கட்டாய நடவடிக்கை நீதிமன்றம் (Zwangsmassnahmengericht), இந்த இரு குற்றச்சாட்டுக்குள்ளானவர்களையும் விசாரணை காவலில் வைக்க உத்தரவிட்டுள்ளது. இந்த வழக்கு தொடர்பான விசாரணை தொடர்ந்து நடைபெற்று வருகிறது.

© Kapo ZH