சுவிஸில் ஒரு லட்சம் பேர் வேலைகளை இழக்கும் அபாயத்தில்

அமெரிக்காவின் 39% இறக்குமதி வரி சுவிட்சர்லாந்தின் ஒரு லட்சம் வேலைகளை நேரடியாக பாதிக்கும் என சுவிஸ் வணிக நிறுவனமான எகனாமிசூசி நிறுவனம் தெரிவித்துள்ளது.

கடிகாரத் தயாரிப்பு, இயந்திரங்கள், உலோகங்கள் மற்றும் உணவு தொழில்கள் மிகவும் பாதிக்கப்படும் என தெரிவித்துள்ளது. “விநியோகஸ்தர்கள் மற்றும் சேவை வழங்குநர்களும் மறைமுகமாக பாதிக்கப்படுவதால், இதன் விளைவுகள் இன்னும் கடுமையாக இருக்கலாம்,” என எகனாமிசூசி  தெரிவித்துள்ளது.

ஆகஸ்ட் 1 அன்று, இரு நாடுகளுக்கிடையிலான வர்த்தக பற்றாக்குறையை காரணம் காட்டி, ஆகஸ்ட் 7 முதல் சுவிஸ் ஏற்றுமதிகளுக்கு 39% வரி விதிக்கப்படும் என வாஷிங்டன் அறிவித்தது. சுவிஸ் ஏற்றுமதியின் முக்கிய தூணான மருந்து தயாரிப்புகள் தற்போது இந்த வரியில் இருந்து விலக்கு அளிக்கப்பட்டுள்ளன.

ஆனால், மருந்து நிறுவனங்கள் விலையை குறைக்காவிட்டால் 250% வரை வரி விதிக்கப்படும் என ஜனாதிபதி டொனால்ட் ட்ரம்ப் எச்சரித்துள்ளார். மருந்துகளுக்கு வரி விதிக்கப்பட்டால், மருந்து தொழிலில் பல வேலைகள் பாதிக்கப்படும்,” என எகனாமிசூசி எச்சரித்துள்ளது.

குறிப்பாக, மின்னணு மற்றும் கடிகாரத் தொழிலில் 20,000 வேலைகளும், உணவு மற்றும் புகையிலை துறையில் 14,200 வேலைகளும், மருந்து துறையில் 13,900 வேலைகளும் பாதிக்கப்படலாம் என அறிவிக்கப்பட்டுள்ளது. ஏற்றுமதி நிறுவனங்களில் பணியாளர்களின் எண்ணிக்கை சராசரியை விட அதிகமாக இருக்கலாம், எனவே பாதிக்கப்படுவோரின் உண்மையான எண்ணிக்கை இன்னும் அதிகமாக இருக்கலாம்,” என கூட்டமைப்பு கூறியுள்ளது.

அமெரிக்காவிற்கு ஏற்றுமதி செய்யும் நிறுவனங்கள் மட்டுமல்லாமல், சுவிஸ் ஏற்றுமதி தொழில்களுக்கு விநியோகம் செய்யும் நிறுவனங்களும் இந்த வரியால் பாதிக்கப்படும் என எகனாமிசூசி நிறுவனம் எச்சரித்துள்ளது.

சுவிஸ் அரசு அமெரிக்காவுடன் பேச்சுவார்த்தைகளை தொடர உறுதியளித்துள்ள நிலையில், “நிறுவனங்களின் நிர்வாக மற்றும் ஒழுங்குமுறை சுமைகளை உடனடியாக குறைத்து, அமெரிக்க சந்தையில் போட்டி தீமைகளை ஈடுகட்ட சுவிட்சர்லாந்தில் சிறந்த சூழலை உருவாக்க வேண்டும்,” என எகனாமிசூசி அரசியல் தலைவர்களை வலியுறுத்தியுள்ளது.

@tamilnewsch