ஐரோப்பிய ஒன்றியத்துடன் ஊதியப் பாதுகாப்பு தொடர்பான பேச்சுவார்த்தை இழுபறி

ஐரோப்பிய ஒன்றியம் (European Union) உடன் சுவிட்சர்லாந்து (Switzerland) நடத்தி வரும் ஊதியப் பாதுகாப்பு தொடர்பான பேச்சுவார்த்தைகள் தற்போது முன்னேற்றமின்றி தடைபட்ட நிலையில் உள்ளன. இந்த பேச்சுவார்த்தைகள், ஐரோப்பிய ஒன்றிய உறுப்புநாடுகளில் இருந்து குறிப்பிட்ட காலத்திற்கு சுவிட்சர்லாந்துக்கு வந்து பணியாற்றும் தொழிலாளர்களை மையமாகக் கொண்டவை. இத்தொழிலாளர்களின் ஊதியம், அவர்கள் தாய்நாட்டிலுள்ள நிறுவனங்களால் வழங்கப்படுகிறது.

ஆனால், இவ்வாறு வெளிநாடுகளில் இருந்து வந்து பணியாற்றும் ஊழியர்களுக்கும், சுவிட்சர்லாந்தில் பணிபுரியும் உள்ளூர் தொழிலாளர்களுக்கு வழங்கப்படும் ஊதியத்துடன் சமமான சம்பளம் கிடைக்க வேண்டும் என்பதில் சுவிஸ் அரசு உறுதியாக உள்ளது. குறைந்த ஊதியம் வழங்கப்படுவதன் மூலம் உள்ளூர் தொழில்சந்தையில் அநீதி ஏற்படக் கூடாது என்பதே சுவிட்சர்லாந்தின் முக்கிய கவலையாக உள்ளது.

இந்த விவகாரத்தில் ஐரோப்பிய ஒன்றியம் பேச்சுவார்த்தைகளை தாமதப்படுத்தி வருவதாக தகவல்கள் தெரிவிக்கின்றன. இருப்பினும், இது சுவிட்சர்லாந்துக்கு மிக முக்கியமான விடயமாக கருதப்படுவதால், இந்த விவகாரத்தில் ஒப்பந்தம் எட்டுவதற்காக ஜனவரி மாத இறுதிவரை அனைத்து தரப்பினருக்கும் கால அவகாசம் வழங்கப்பட்டுள்ளதாக கூட்டாட்சி அரசு தெரிவித்துள்ளது.

ஐரோப்பிய ஒன்றியத்துடன் சுவிட்சர்லாந்து கொண்டுள்ள இருதரப்பு ஒப்பந்தங்களில், தொழிலாளர் பாதுகாப்பும் ஊதிய சமத்துவமும் அரசியல் ரீதியாகவும் சமூக ரீதியாகவும் மிக முக்கியமான அம்சங்களாக பார்க்கப்படுகின்றன. எனவே, வரவிருக்கும் நாட்களில் இந்த பேச்சுவார்த்தைகள் எந்த திசையில் நகரும் என்பதைக் கவனமாக கண்காணித்து வருகின்றனர் அரசியல் வட்டாரங்கள்.

© KeytoneSDA