குறைந்த பிறப்பு விகிதத்தால் சுவிட்சர்லாந்தின் பொருளாதாரம் பாதிப்பு

தொழிலாளர் குறைபாடு காரணமாக தொழில் வளர்ச்சியில் கடும் பின்னடைவு ஏற்படப்போவதாக உலக பொருளாதார ஒத்துழைப்பு மற்றும் வளர்ச்சி அமைப்பு அதன் சமீபத்திய வேலைவாய்ப்பு அறிக்கையில் எச்சரித்துள்ளது. குறிப்பாக சுவிட்சர்லாந்தும், ஜெர்மனியும் பெரிதும் பாதிக்கப்படப்போவதாகவும், வளர்ச்சி வீதம் வருங்காலத்தில் மிகக் குறைவாகவே இருக்கும் எனவும் குறிப்பிடப்பட்டுள்ளது.

இதற்குப் பிரதான காரணமாக குறைந்து வரும் பிறப்பியல்விகிதமும், பெருந்தொகை வயதான தொழிலாளர்கள் ஓய்விற்கு செல்வதுமான இரண்டு அம்சங்கள் கூறப்படுகின்றன . இதனால், கடந்த பல ஆண்டுகளாக நாட்டு வளத்திற்கு அடித்தளமாக இருந்த தொழிலாளர் விரிவாக்கம் குறைவடைவதாகவும், இதனால் உள்நாட்டு வளர்ச்சி தடைபடுவதாகவும் கூறப்படுகிறது.

2060-ஆம் ஆண்டுக்குள் வளர்ச்சி வீதம் சீரான குறைவை சந்திக்கலாம்

உலக பொருளாதார ஒத்துழைப்பு மற்றும் வளர்ச்சி அமைப்பின் கணிப்புப்படி, தற்போதைய ஆண்டு ஒன்றுக்கு ஒரு நபருக்கான வளர்ச்சி வீதமான 1% என்பது, 2060-இற்கு முன்னதாகவே 0.6% ஆகக் குறைந்து விடலாம். சுவிட்சர்லாந்தும் ஜெர்மனியும் 0.1% முதல் 0.3% வரை மட்டுமே வளர்ச்சி பெறும் நிலைக்கு செல்லும் என்று எதிர்பார்க்கப்படுகிறது. ஆஸ்திரியா மற்றும் இத்தாலி போன்ற நாடுகளில் வளர்ச்சி மாறாகத் திரும்ப வாய்ப்புள்ளதாகவும் அறிக்கை கூறுகிறது.

தொழில்நுட்ப வளர்ச்சி மட்டுமே போதாது

அறிக்கையில், செயற்கை நுண்ணறிவு போன்ற புதிய தொழில்நுட்பங்கள் உற்பத்தித்திறனை உயர்த்தக்கூடியவை என்றாலும், கடந்த சில ஆண்டுகளில் பங்களிப்பு குறைந்துள்ளதாக தெரிவிக்கப்படுகிறது. மேலும், தொழிலாளர்களின் வேலை நேரம் கடந்த 20 ஆண்டுகளில் சராசரியாக 6% குறைந்துள்ளதாகவும் குறிப்பிடப்படுகிறது.

இந்த வளர்ச்சி பின்னடைவைக் கட்டுப்படுத்த, உலக பொருளாதார ஒத்துழைப்பு மற்றும் வளர்ச்சி அமைப்பு பல பரிந்துரைகளை முன்வைக்கிறது. முக்கியமான ஒன்றாக, குடியிருப்பாளர்களின் வேலைவாய்ப்பு பங்கு அதிகரிக்கப்பட வேண்டும். குறிப்பாக, பெண்கள் மற்றும் மூத்த தொழிலாளர்களை அதிகம் பணியில் சேர்க்கலாம் எனவும், அவர்களின் உடல்நிலை மற்றும் தொழில்பருவ சூழ்நிலைகள் முன்னேற்றமடைந்துள்ளன என்பதும் வலியுறுத்தப்படுகிறது.

மேலும், வாழ்நாள் முழுவதும் பயிலும் கற்றல் வாய்ப்புகள், தொழில்துறை மாறும் சாத்தியங்கள் மற்றும் தொழிலாளர்களுக்கான பயிற்சி திட்டங்களை அரசாங்கங்கள் மேம்படுத்த வேண்டும் என அறிவுறுத்தப்பட்டுள்ளது.

இந்த நடவடிக்கைகள், அதிகரிக்கும் ஓய்வூதிய செலவுகள் மற்றும் சுகாதாரச் சவால்களை சமாளிக்க தேவையானவை என்றும், தலைமுறை நியாயம் (Generation Fairness) என்ற கோணத்திலும்கூட முக்கியம் வாய்ந்தவை என்றும் உலக பொருளாதார ஒத்துழைப்பு மற்றும் வளர்ச்சி அமைப்பு கூறுகிறது.