சூரிச் கன்டோன்: ‘மாற்று சிகிச்சை’க்கு தடை விதிக்கும் முன்மொழிவு – ஆதரவிலும் எதிர்ப்பிலும் விவாதம்

சுவிட்சர்லாந்தின் சூரிச் கன்டோன் அரசு, லெஸ்பியன், Gay மற்றும் பைசெக்சுவல் நபர்களின் பால்புணர்ச்சி விருப்பத்தை மாற்றுவதாகக் கூறப்படும் “மாற்று சிகிச்சைகள்” (Conversion Therapies) மீது தடை விதிக்க முன்மொழிந்துள்ளது. இத்தகைய சிகிச்சைகளை வழங்குவோரும், அவற்றை விளம்பரம் செய்பவர்களும் அபராத தண்டனைக்கு உட்படுவார்கள் என அரசு கவுன்சில் தெரிவித்துள்ளது.

இந்த முன்மொழிவு, 2023 நவம்பரில் கன்டோன் பாராளுமன்றம் நிறைவேற்றிய தீர்மானத்தின் அடுத்தடுத்த செயல்பாடாகும். அப்போது கன்டோன் மட்டத்திலேயே தடை அவசியமா என்ற கேள்வியில் கடும் விவாதம் நடந்தது. எதிர்ப்பாளர்கள், ஏற்கனவே கூட்டாட்சிப் பொறுப்பில் நாடு முழுவதும் தடை விதிக்க முயற்சிகள் நடைபெற்று வருவதாகவும், அதனால் தனிநிலை கன்டோன் சட்டத்தின் தேவையில்லை என்றும் கூறினர்.

ஆதரவாளர்கள், இந்த “மாற்று சிகிச்சைகள்” பாதிக்கப்பட்டவர்களுக்கு ஏற்படுத்தும் மனநல மற்றும் சமூக பாதிப்புகளை வலியுறுத்தி, தடை மிகத் தேவையானது என  வாதிடுகின்றனர். இந்த மசோதாவுக்கு எதிராக இன்னும் மக்கள் வாக்கெடுப்பு நடத்தும் வாய்ப்பு உள்ளது.

இந்நிலையில், சுவிட்சர்லாந்தின் பல கன்டோன்கள் ஏற்கனவே இத்தகைய தடை திருத்தங்களை ஆதரித்துள்ளன. ஷாஃப்ஹௌசன், சென்ட்.காலன், வலெய்ஸ், வாட், பெர்ன் ஆகிய கன்டோன்கள் நேரடியாக தடை கேட்டு தீர்மானங்கள் நிறைவேற்றியுள்ளன. ஆர்கௌ, பாசல்-சிட்டி, லுசேர்ன் ஆகியவை நாடு முழுவதும் ஒரே மாதிரியான சட்டம் கொண்டு வர வேண்டுமென ஆதரிக்கின்றன. கூட்டாட்சி அரசு தற்போது நிலவும் சட்டங்கள் இப்படியான தவறான சிகிச்சைகளுக்கு எதிராக நடவடிக்கை எடுக்க போதுமா என்பதை பரிசீலித்து வருகிறது.

சுவிட்சர்லாந்தில் எத்தனை “மாற்று சிகிச்சைகள்” நடைபெறுகின்றன என்பது குறித்து துல்லிய தகவல் இல்லை. ஆனால் சில தனிப்பட்ட சம்பவங்கள் முறையே ஊடகங்களின் கவனத்திற்கு தெரிவதுண்டு. 2018ஆம் ஆண்டில் ஜெனீவா மற்றும் வாட் கன்டோன்களில் செயல்பட்ட ஒரு ஹோமியோபதி மருத்துவர் “ஹோமோசெக்சுவாலிட்டியை குணப்படுத்துவதாக” விளம்பரப்படுத்தினார்.

2020ஆம் ஆண்டு ஸ்விட்ஸ் கன்டோனில் ஒரு மனநல மருத்துவர் இத்தகைய சிகிச்சைகளை வழங்க தயாராக இருப்பதாக அறிவித்ததும் பரபரப்பை ஏற்படுத்தியது. மனநல நிபுணர்கள், மாற்று சிகிச்சைகள் விஞ்ஞான ஆதாரமற்று இருப்பதோடு, மனஅழுத்தம், தற்கொலை எண்ணங்கள் மற்றும் நீண்டகால மனநலப் பிரச்சினைகள் உருவாகும் அபாயத்தையும் கொண்டவை என எச்சரித்து வருகின்றனர்.

® KeystoneSDA