A9 நெரிசலை தவிர்க்க கிராமப்புற சாலைகள் பயன்படுத்தும் ஓட்டுநர்கள்; வலைஸ், வோட் பகுதிகளில் மக்கள் அதிருப்தி

குளிர்கால சுற்றுலா காலத்தில் A9 அதிவேக நெடுஞ்சாலையில் ஏற்படும் கடும் போக்குவரத்து நெரிசலை தவிர்க்க முயலும் ஓட்டுநர்கள், அருகிலுள்ள கிராமப்புற சாலைகளை பயன்படுத்த தொடங்கியதால் வலைஸ் (Valais) மற்றும் வோட் (Vaud) கன்டோன்களில் உள்ள உள்ளூர் மக்கள் கடும் அதிருப்தி தெரிவித்து வருகின்றனர்.

ஒவ்வொரு ஆண்டும் குளிர்காலம் தொடங்கும் போது இந்த பிரச்சினை மீண்டும் மீண்டும் உருவாகிறது. குறிப்பாக வெள்ளிக்கிழமைகளில் வலைஸ் நோக்கி பயணம் செய்யும் வாகனங்களாலும், ஞாயிற்றுக்கிழமைகளின் மாலை நேரங்களில் திரும்பிச் செல்லும் போக்குவரத்தாலும் A9 நெடுஞ்சாலையில் நீண்ட வரிசை நெரிசல் ஏற்படுகிறது. சுற்றுலா பயணிகள் அதிகமாக வருவதால், இந்த பாதை பல மணிநேரங்கள் மந்தமாக இயங்குவது வழக்கமாகிவிட்டது.

வெவே (Vevey) மற்றும் மொன்றோ (Montreux) பகுதிகளைச் சுற்றியுள்ள சாலைகளில் சில நேரங்களில் 45 நிமிடங்கள் வரை தாமதம் ஏற்படுகிறது என்று அதிகாரிகள் தெரிவிக்கின்றனர். இந்த நெரிசலைத் தவிர்க்க சில ஓட்டுநர்கள் மாற்றுச் சாலைகளாக உள்ள சிறிய கிராமப்புற பாதைகளைத் தேர்வு செய்கின்றனர். ஆனால் அதனால் அங்கு வசிக்கும் மக்களுக்கு புதிய சிக்கல்கள் உருவாகின்றன. அமைதியான கிராமங்களில் கூடுதல் வாகன போக்குவரத்து அதிகரிப்பதால் சத்தம், பாதுகாப்பு மற்றும் சாலை நெரிசல் போன்ற பிரச்சினைகள் அதிகரித்து வருகின்றன.

இந்த நிலைமையை சமாளிக்க வோட் (Vaud) கன்டோன் அதிகாரிகள் சுவிஸ் ரயில்வே மற்றும் சுற்றுலா துறையினருடன் இணைந்து தீர்வுகளை ஆராயத் தொடங்கியுள்ளனர். குறிப்பாக பொதுப் போக்குவரத்து சேவைகளை மேலும் மேம்படுத்துவது, ரயில் பயணத்தை ஊக்குவிப்பது, மற்றும் பள்ளி விடுமுறை கால அட்டவணைகளை ஒரே நேரத்தில் இல்லாமல் பிரித்து அமைப்பது போன்ற திட்டங்கள் குறித்து ஆலோசனைகள் நடைபெற்று வருகின்றன. இதனால் ஒரே நேரத்தில் அதிகமான மக்கள் பயணம் செய்வதை குறைத்து, நெடுஞ்சாலை நெரிசலை தணிக்க முடியும் என எதிர்பார்க்கப்படுகிறது.  © WRS