2026 முதல் சுவிட்சர்லாந்தில் பல்வேறு புதிய சட்டங்கள் அமுல். மருத்துவக்காப்பீடு மீண்டும் அதிகரிப்பு

2026 ஜனவரி 1 முதல் சுவிட்சர்லாந்து முழுவதும் மருத்துவ காப்பீட்டு கட்டணங்கள் உயர்வடைய உள்ளன. தேசிய அளவில் சராசரியாக 4.4 சதவீத உயர்வு அமலுக்கு வரும் என அதிகாரிகள் அறிவித்துள்ளனர். இருப்பினும், சில கன்டோன்களில் இந்த உயர்வு இதைவிட அதிகமாக இருக்கும். குறிப்பாக டிசினோ கன்டோனில் வசிப்பவர்களுக்கு மிக அதிக பாதிப்பு ஏற்படும் நிலையில், அங்கு மருத்துவ காப்பீட்டு கட்டணம் தற்போதைய நிலையை விட 6.9 சதவீதம் அதிகரிக்கிறது.

இதன் காரணமாக, டிசினோ கன்டோனில் உள்ள ஒரு நபருக்கான மாதாந்திர மருத்துவ காப்பீட்டு கட்டணம் சராசரியாக 582 சுவிஸ் ஃப்ராங்குகள் வரை உயரும் என தெரிவிக்கப்பட்டுள்ளது. தொடர்ந்து உயரும் சுகாதாரச் செலவுகள் காரணமாக இந்த கட்டண உயர்வு தவிர்க்க முடியாததாகியுள்ளது என காப்பீட்டு நிறுவனங்கள் விளக்கம் அளிக்கின்றன.

இதற்கிடையில், குடிமக்களின் பாதுகாப்பை வலுப்படுத்தும் முக்கியமான சட்ட மாற்றமும் ஜனவரி 1 முதல் அமலுக்கு வருகிறது. இதுவரை பின்தொடர்தல் மற்றும் தொடர்ச்சியான தொந்தரவு போன்ற ‘ஸ்டாக்கிங்’ சம்பவங்களில் பாதிக்கப்பட்டவர்களுக்கு குற்றவாளிகளை எதிர்த்து சட்ட நடவடிக்கை எடுப்பதற்கான வாய்ப்புகள் குறைவாகவே இருந்தன. தற்போது இந்த வகையான தொந்தரவு நேரடியாக குற்றச் சட்டத்தில் சேர்க்கப்பட்டுள்ளது. இதன் மூலம், பாதிக்கப்பட்டவர்கள் குற்றவாளிகளுக்கு எதிராக தெளிவான சட்ட நடவடிக்கைகளை எடுக்க முடியும் என்பதுடன், இத்தகைய செயல்களுக்கு கடும் தண்டனை வழங்கவும் வழி ஏற்படுத்தப்பட்டுள்ளது.

மேலும், சுகாதாரத் துறையில் பொதுமக்களுக்கு ஓர் நிவாரணமாக, சில தடுப்பூசிகளுக்கான இணை கட்டணங்கள் (co-pay) ரத்து செய்யப்படுகின்றன. Federal Office of Public Health பரிந்துரைத்துள்ள பல தடுப்பூசிகள், 2026 ஜனவரி 1 முதல் காப்பீட்டாளர்களுக்கு கூடுதல் செலவில்லாமல் வழங்கப்படும். இதில் கொரோனா, காசநோய், நிமோனியா, மெனிஞ்ஜோகோகல் தொற்று, டிப்தீரியா, டெட்டனஸ் ஆகியவற்றுக்கான தடுப்பூசிகளுடன், கர்ப்பிணிப் பெண்களுக்கு வழங்கப்படும் RSV தடுப்பூசியும் அடங்கும். பொதுச் சுகாதாரத்தை மேம்படுத்தும் நோக்கில் இந்த முடிவு எடுக்கப்பட்டுள்ளதாக அதிகாரிகள் தெரிவித்துள்ளனர்.

இந்த மாற்றங்கள், ஒருபுறம் மக்கள் மீது பொருளாதார அழுத்தத்தை அதிகரிக்கக் கூடும் என்றாலும், மறுபுறம் பாதுகாப்பும் சுகாதாரமும் உறுதி செய்யப்படும் வகையில் முக்கியமான சட்ட மற்றும் கொள்கை மாற்றங்களாக பார்க்கப்படுகின்றன.

© KeystoneSDA