சுவிட்சர்லாந்தின் அடுத்த ஜனாதிபதியாக Guy Parmelin தேர்வு; பெரும்பான்மை வாக்குகளால் சாதனை

சுவிட்சர்லாந்தின் 2026ஆம் ஆண்டுக்கான ஜனாதிபதியாக கூட்டாட்சி அரசின் உறுப்பினரான காய் பார்மலின் (Guy Parmelin) தேர்வு செய்யப்பட்டுள்ளார். புதன்கிழமை, டிசம்பர் 10 அன்று நடைபெற்ற கூட்டு நாடாளுமன்ற வாக்கெடுப்பில் அவர் வரலாற்றுச் சிறப்பான பெரும்பான்மை வாக்குகளைப் பெற்றார்.

சுவிட்சர்லாந்தில் நாட்டின் நிர்வாகத்தை ஏழு உறுப்பினர்கள் கொண்ட ‘சுவிஸ் ஃபெடரல் கவுன்சில்’ நடத்துகிறது. வருடந்தோறும் இந்த கவுன்சில் உறுப்பினர்களில் ஒருவரை நாடாளுமன்றம் ஜனாதிபதியாகத் தேர்வு செய்யும் நடைமுறை உள்ளது. இது ஒரு மரியாதை மற்றும் ஒருங்கிணைப்புப் பதவி என்பதாலும், செயல் அதிகாரம் முழு கவுன்சிலுடனே இருக்கும் என்பதாலும் தனித்துவமானது.

இந்த ஆண்டு நடைபெற்ற வாக்கெடுப்பில் 210 நாடாளுமன்ற உறுப்பினர்கள் பங்கேற்றனர். இதில் 203 வாக்குகளைப் பெற்று பார்மலின் வெற்றி பெற்றார். சுவிஸ் அரசியல் வரலாற்றில் எந்த வேட்பாளரும் இதற்குமுன் இத்தனை உயர்ந்த பெரும்பான்மை வாக்குகளைப் பெற்றதில்லை என்பதால், இது ஒரு புதிய சாதனையாகப் பார்க்கப்படுகிறது.

காய் பார்மலின், சுவிட்சர்லாந்தின் வலதுசாரி கட்சியாக விளங்கும் ‘சுவிஸ் மக்கள் கட்சி’ (SVP)–யைச் சேர்ந்தவர். இந்தக் கட்சி கடுமையான புலம்பெயர்தல் எதிர்ப்பு நிலைப்பாடுகளுக்கும், குடியேற்றக் கொள்கைகளில் சர்ச்சைக்குரிய முன்மொழிவுகளுக்கும் பெயர் பெற்றது. இந்தப் பின்னணியில் பார்மலின் ஜனாதிபதி ஆகிறார் என்பது நாட்டின் அரசியல் சூழலில் கூடுதல் விவாதங்களை ஏற்படுத்தியுள்ளது.

பார்மலின் இதற்கு முன் பல அமைச்சுப் பொறுப்புகளை வகித்த அனுபவமுள்ளவர். அவரின் தேர்தல், கூட்டாட்சி அரசின் நிலைத்தன்மையையும், நாடாளுமன்றத்தின் விரிவான ஆதரவும் பிரதிபலிப்பதாக அரசியல் நிபுணர்கள் மதிப்பிடுகின்றனர்.

2026 ஆம் ஆண்டில், சுவிட்சர்லாந்தின் உள்நாட்டு விவகாரங்கள், குடியேற்றம், ஐரோப்பிய ஒன்றியத்துடன் உள்ள உறவுகள் உள்ளிட்ட பல துறைகளில் பார்மலின் முக்கிய ஒருங்கிணைப்புப் பொறுப்பை வகிக்க உள்ளார்.