லுகானோ கத்திக்குத்து சம்பவ விசாரணை: போதைப்பொருள் வழக்கில் மேலும் ஒருவர் கைது

கடந்த ஆண்டு அக்டோபர் 24 அன்று, டிசினோ கன்டோனில் உள்ள Lugano நகரில் உள்ள ஒரு குடியிருப்பில் நிகழ்ந்த கத்திக்குத்து சம்பவத்தைத் தொடர்ந்து மேற்கொள்ளப்பட்ட விசாரணைகளின் தொடர்ச்சியாக, சமீப நாட்களில் மேலும் ஒரு கைது நடவடிக்கை மேற்கொள்ளப்பட்டுள்ளது. இதற்கு முன், கடந்த டிசம்பர் மாத நடுப்பகுதியில் மூன்று பேர் கைது செய்யப்பட்டிருந்த நிலையில், தற்போது நான்காவது நபர் போலீசாரின் வலையில் சிக்கியுள்ளார்.

இன்று வெளியிடப்பட்ட தகவலின்படி, கன்டோன் போலீசார் மற்றும் அரசு வழக்குத் துறை இணைந்து நடத்திய நடவடிக்கையில், 48 வயதுடைய இத்தாலிய குடிமகன் ஒருவர் கைது செய்யப்பட்டுள்ளார். லுகானோ பகுதியைச் சேர்ந்தவராக பதிவு செய்யப்பட்டுள்ள இந்த நபர், சோட்டோசெனெரி (Sottoceneri) பகுதியில் மையமாக கொண்டு நடைபெற்ற போதைப்பொருள் கடத்தல் நடவடிக்கைகளில் பல்வேறு வகைகளில் தொடர்புடையவராக இருக்கலாம் என்ற சந்தேகத்தின் பேரில் கைது செய்யப்பட்டுள்ளார்.

அந்த நபருக்கு எதிராக முன்வைக்கப்பட்டுள்ள முக்கிய குற்றச்சாட்டுகளில், போதைப்பொருள் தொடர்பான சுவிட்சர்லாந்தின் மத்திய சட்டத்தை மீறுதல் மற்றும் அதனுடன் தொடர்புடைய குற்றங்கள், பணம் கழுவல் குற்றம், மேலும் வெளிநாட்டவர்களைச் சார்ந்த மத்திய சட்டத்தை மீறுதல் ஆகியவை அடங்கும். விசாரணை அதிகாரிகள் தெரிவித்தபடி, அவரின் சுதந்திரத்தை கட்டுப்படுத்தும் நடவடிக்கைகள் ஏற்கனவே கட்டாய நடவடிக்கைகள் தொடர்பான நீதிபதியால் உறுதிப்படுத்தப்பட்டுள்ளன.

இந்த விசாரணை முழுவதும் அரசு வழக்கறிஞர் Veronica Lipari தலைமையில் ஒருங்கிணைக்கப்பட்டு நடைபெற்று வருகிறது. கத்திக்குத்து சம்பவத்தை மையமாகக் கொண்டு தொடங்கிய இந்த வழக்கு, தற்போது டிசினோ கன்டோனில் போதைப்பொருள் குற்றச்செயல்கள் தொடர்பான விரிவான விசாரணையாக விரிவடைந்துள்ளமை குறிப்பிடத்தக்கதாகும்.

© Kapop TI