ஜெனீவாவில் 9.51 காரட் நீல வைரம் 25 மில்லியன் டாலருக்கு விற்பனை

ஜெனீவாவில் நடைபெற்ற கிறிஸ்டீஸ் ஏலத்தில் “தி மெலன் ப்ளூ” எனப்படும் 9.51 காரட் எடையுடைய அரிய நீல வைரம் 2.55 கோடி அமெரிக்க டாலர் (சுமார் 17.4 மில்லியன் சுவிஸ் பிராங்க்) மதிப்பில் விற்கப்பட்டது. மிகத் தூய்மையான மற்றும் அரிதான நிறத் தன்மையைக் கொண்ட இந்த வைரத்தின் விலை, ஆரம்பத்தில் கணிக்கப்பட்ட 20 முதல் 30 மில்லியன் டாலர் மதிப்பிற்குள் அமைந்தது என்று கிறிஸ்டீஸ் தெரிவித்துள்ளது.

கிறிஸ்டீஸ் நகைத் துறையின் சர்வதேச இயக்குநர் ராகுல் கதகியா கூறுகையில், “இந்த வைரம் உலகில் ஏலத்தில் விற்கப்பட்ட மிகவும் அழகான வண்ண வைரங்களில் ஒன்றாகும்” என்று தெரிவித்துள்ளார்.

இந்த வைரம் முன்பு “சோயி டையமண்ட்” என்ற பெயரில் 2014ஆம் ஆண்டு நியூயார்க் நகரில் நடைபெற்ற சோத்பீஸ் ஏலத்தில் 32.6 மில்லியன் டாலருக்கு விற்கப்பட்டு, அப்போது நீல வைரங்களுக்கான உலகச் சாதனையை ஏற்படுத்தியது. பின்னர் இது மோதிரத்திற்குப் பதிலாக Pendant ஆக வடிவமைக்கப்பட்டது.

“தி மெலன் ப்ளூ” வைரத்துக்கு பெயர் பெற்றவர், அமெரிக்கத் தாவரவியல் நிபுணர், தன்னார்வத் தொண்டு செயற்பாட்டாளர் மற்றும் கலைச் சேகரிப்பாளர் ராசல் லாம்பர்ட் மெலன், பொதுவாக “பன்னி மெலன்” என்று அறியப்பட்டவர். இவர் 1961 ஆம் ஆண்டு அமெரிக்க அதிபர் ஜான் எப். கேனெடியின் வேண்டுகோளின்பேரில் வெள்ளை இல்லத்தின் ரோஜா தோட்டத்தை மறுவடிவமைத்ததற்காகவும் பிரபலமானவர்.

கிறிஸ்டீஸ் நிறுவனம் இதற்கு முன் விற்ற மிக உயர்ந்த விலைமதிப்புடைய நீல வைரம் “ஒப்பன்ஹைமர் ப்ளூ” ஆகும். 14.62 காரட் எடையுடைய அந்த வைரம் 2016 ஆம் ஆண்டு ஜெனீவாவில் 57.5 மில்லியன் டாலருக்கு விற்கப்பட்டு, இன்று வரை ஒரு உலகச் சாதனையாக திகழ்கிறது.

இந்த அரிய “மெலன் ப்ளூ” வைரத்தின் விற்பனை, உலகளாவிய அரிய நகைச் சந்தையில் நீல வைரங்களுக்கான எதிரொலியை மீண்டும் தூண்டியுள்ளது.

© KeystoneSDA