ஓநாய் ஒழுங்குமுறையில் மாற்றம்; பரிசோதனை விதிகளில் தளர்வு

2023 டிசம்பர் மாதத்தில் சுவிட்சர்லாந்தின் வேட்டையாடல் சட்டத்தில் செய்யப்பட்ட திருத்தம் அமலுக்கு வந்ததன் பின்னர், கன்டோன்களுக்கு ஓநாய்களின் எண்ணிக்கையை முன்கூட்டியே கட்டுப்படுத்தும் அதிகாரம் வழங்கப்பட்டுள்ளது. இந்த சட்ட மாற்றத்துக்குப் பிறகு, சுவிட்சர்லாந்து கூட்டாட்சி சுற்றுச்சூழல் அலுவலக (UFAM) அனுமதியுடன் மேற்கொள்ளப்படும் ஓநாய் ஒழிப்பு நடவடிக்கைகள் கணிசமாக அதிகரித்துள்ளதாக அதிகாரிகள் தெரிவித்துள்ளனர்.

முன்னதாக, சுவிட்சர்லாந்தில் சுட்டுக் கொல்லப்படும் அனைத்து ஓநாய்களும் பெர்ன் நகரில் உள்ள மீன்கள் மற்றும் காட்டு விலங்குகளுக்கான மருத்துவ மையமான FIWI-க்கு அனுப்பப்பட்டு விரிவான ஆய்வுக்கு உட்படுத்தப்பட வேண்டும் என்பது கட்டாயமாக இருந்தது. ஆனால் தற்போது அந்த நடைமுறை மாற்றப்பட்டுள்ளது. “ஒழிக்கப்பட்ட விலங்குகளின் எண்ணிக்கை பெரிதும் உயர்ந்துள்ளது,” என சுவிட்சர்லாந்து கூட்டாட்சி சுற்றுச்சூழல் அலுவலகம், Keystone-ATS செய்தி நிறுவனத்திடம் தெரிவித்துள்ளது. மேலும், சுட்டுக் கொல்லப்படும் ஓநாய்கள் பெரும்பாலும் உடல்நலமாக இருப்பதாகவும் அது விளக்கமளித்துள்ளது.

இதனால், இனி நோயின் அறிகுறிகள், முன் ஏற்பட்ட காயங்கள் அல்லது சட்டவிரோத வேட்டையாடல் சந்தேகம் உள்ள ஓநாய்களுக்கு மட்டுமே மருத்துவ பரிசோதனை கட்டாயமாக்கப்பட்டுள்ளது. அனைத்து ஓநாய் உடல்களையும் மீண்டும் கன்டோன்களுக்கு வழங்குவது சாத்தியமில்லை என்றும் சுவிட்சர்லாந்து கூட்டாட்சி சுற்றுச்சூழல் அலுவலகம் தெரிவித்துள்ளது. அதற்குக் காரணமாக, அந்த நிறுவனத்தில் சேமிப்பு மற்றும் குளிர்சாதன வசதிகள் குறைவாக இருப்பதும், உயிரியல் பாதுகாப்பு விதிமுறைகள் கடைபிடிக்கப்பட வேண்டியதுமாகும். சில சந்தர்ப்பங்களில், இவை ஓநாய் உடல்களை மீள வழங்க முடியாத நிலையை உருவாக்குகின்றன.

மேலும், ஒழிக்கப்பட்ட ஓநாய்களின் உடல்களை எவ்வாறு பயன்படுத்துவது என்பது ஒவ்வொரு கன்டோனின் தனிப்பட்ட முடிவாகும். இதுகுறித்து UFAM-க்கு தகவல் அளிக்க வேண்டிய கட்டாயம் கன்டோன் அதிகாரிகளுக்கு இல்லை என்றும் தெரிவிக்கப்பட்டுள்ளது.

© KeystoneSDA