சுவிட்சர்லாந்தில் முன்கூட்டிய ஓய்வுக்கு கடும் கட்டுப்பாடுகள் வர வாய்ப்பு

Switzerland-ல் சட்டப்படி நிர்ணயிக்கப்பட்ட 65 வயதுக்கு முன்பாக ஓய்வு பெறும் முறையில் முக்கிய மாற்றங்களை கொண்டுவர அரசாங்கம் திட்டமிட்டுள்ளது. குறிப்பாக, முன்கூட்டிய ஓய்வை கட்டுப்படுத்தும் நோக்கில், 63 வயதுக்கு முன் ஓய்வூதிய நிதி மற்றும் மூன்றாம் தூண் சேமிப்புகளைப் பயன்படுத்துவதற்கு தடையிடுவது குறித்து அதிகாரிகள் தீவிரமாக பரிசீலித்து வருகின்றனர்.

இதுவரை, அதிக வருமானம் பெறுபவர்கள் மற்றும் பெரிய அளவிலான ஓய்வூதிய நிதி சேமிப்புகள் கொண்டவர்கள் மட்டுமே 58 வயதிலிருந்தே பணியிலிருந்து விலக முடிந்த நிலை இருந்தது. கூடுதல் ஓய்வூதிய பயன்கள் மற்றும் துணைத் திட்டங்கள் அவர்களுக்கு இந்த வசதியை வழங்கி வந்தன. இதனால், முன்கூட்டிய ஓய்வு என்பது பெரும்பாலும் உயர்வருமானக் குழுவினருக்கே சாத்தியமான ஒன்றாக இருந்து வந்தது.

ஆனால் நடுத்தர வர்க்கத்தைப் பொறுத்தவரை, சட்டப்படி நிர்ணயிக்கப்பட்ட ஓய்வு வயதுக்கு நான்கு அல்லது ஐந்து ஆண்டுகள் முன்பே ஓய்வு பெறுவது நடைமுறையில் சாத்தியமில்லை. காரணம், இரண்டாம் தூண் ஓய்வூதியத்தில் ஏற்படும் கடுமையான குறைப்புகள் அவர்களின் மாத வருமானத்தை பெரிதும் பாதிக்கும் என்பதுதான். இதனால், பலர் உடல்நலம் அல்லது குடும்ப காரணங்களுக்காக விரும்பினாலும், முன்கூட்டிய ஓய்வைத் தேர்வு செய்ய முடியாத நிலை தொடர்ந்தது.

இந்நிலையில், எதிர்காலத்தில் எல்லா சமூகத்தினருக்கும் ஒரே விதமான விதிமுறைகள் அமல்படுத்தப்படலாம் என அரசு வட்டாரங்கள் தெரிவிக்கின்றன. முன்கூட்டிய ஓய்வில் “இரட்டை நிலைமை” உருவாகக் கூடாது என்பதே இந்த நடவடிக்கையின் முக்கிய நோக்கம் என அதிகாரிகள் விளக்குகின்றனர். அதாவது, பணக்காரர்களுக்கு ஒரு விதி, நடுத்தர மற்றும் குறைந்த வருமானத்தவர்களுக்கு வேறு விதி என்ற நிலையைத் தவிர்க்க, அனைவருக்கும் ஒரே மாதிரியான கட்டுப்பாடுகள் அமலுக்கு வரலாம்.

இந்த மாற்றங்கள் நடைமுறைக்கு வந்தால், சுவிட்சர்லாந்தில் ஓய்வூதிய அமைப்பில் குறிப்பிடத்தக்க தாக்கத்தை ஏற்படுத்தும். குறிப்பாக, முன்கூட்டிய ஓய்வு, ஓய்வூதிய நிதி அணுகல், இரண்டாம் தூண் மற்றும் மூன்றாம் தூண் சேமிப்புகள் போன்ற விடயங்களில் பொதுமக்கள் நீண்டகால திட்டமிடலை மறுபரிசீலனை செய்ய வேண்டிய சூழல் உருவாகலாம்.

© KeystoneSDA