சுவிஸில் கடந்த ஐந்து ஆண்டுகளில் கொலை வழக்குகள் குறித்த அரசு புள்ளிவிவரம் வெளியீடு – பெரும்பாலான பாதிப்புகள் பெண்கள்

சுவிஸ் கூட்டாட்சி புள்ளிவிவர அலுவலகம் (FSO) வெளியிட்ட புதிய அறிக்கையின் மூலம், 2019 முதல் 2023 வரை நாட்டில் நடைபெற்ற கொலை மற்றும் கொலை முயற்சி சம்பவங்கள் குறித்து விரிவான தரவுகள் வெளிச்சமிட்டுள்ளன. இது சுவிஸ் காவல்துறை குற்றப் புள்ளிவிவரத்தின் (PCS) ஒரு விரிவாக்கமாகும், இதில் பாதிக்கப்பட்டவர்கள் மற்றும் குற்றம்சாட்டப்பட்டவர்களின் பின்னணி குறித்த கூடுதல் தகவல்கள் சேகரிக்கப்பட்டுள்ளன.

அறிக்கையின் படி, திருமணமான அல்லது இணைந்து வாழும் தம்பதிகள் இடையிலான கொலைகளில் பாதிப்படைந்தவர்கள் பெரும்பாலும் பெண்கள் சுமார் 93 சதவீதம். இதேவேளை, குற்றம்சாட்டப்பட்டவர்கள் பெரும்பாலும் ஆண்களாக இருப்பது குறிப்பிடத்தக்கது.

வீட்டுக்குள் நிகழும் வன்முறைகளைத் தவிர்த்து சமூகத்திற்குப் புறம்பாக நிகழும் கொலைச் சம்பவங்களில், நிலை மாறுகிறது. இத்தகைய வழக்குகளில் உயிரிழந்தவர்களில் 73 சதவீதம் ஆண்கள் ஆவர், மேலும் குற்றம்சாட்டப்பட்டவர்களில் 94 சதவீதம் ஆண்கள் என புள்ளிவிவரம் தெரிவிக்கிறது.

சுவிஸ் கூட்டாட்சி புள்ளிவிவர அலுவலகம் தனது அறிக்கையில் “கொலைக்கான காரணங்கள் பலமடங்கு சிக்கலானவை; அவை ஒரே காரணத்தால் மட்டுமே விளக்க முடியாது” என குறிப்பிடுகிறது. தம்பதிகள் அல்லது குடும்பங்களுக்குள் உருவாகும் மனஅழுத்தம், தகராறு மற்றும் வன்முறை சம்பவங்களுக்கு பல அபாயக் காரணிகள் காரணமாகின்றன.

தம்பதிகள் இடையிலான கொலை அல்லது கொலை முயற்சிகளில் ஈடுபட்டவர்களில் 29 சதவீதம் மதுபானம், போதைப்பொருள் அல்லது மருந்துகளின் தாக்கத்தில் இருந்ததாகவும், 28 சதவீதம் நிதி பிரச்சனைகள் சந்தித்ததாகவும், மேலும் 28 சதவீதம் மனநல சிக்கல்களால் பாதிக்கப்பட்டிருந்ததாகவும் அறிக்கை தெரிவிக்கிறது.

சுவிஸில் குடும்ப வன்முறை மற்றும் தம்பதியர் இடையிலான கொலை சம்பவங்கள் சமீப ஆண்டுகளில் அதிக கவனம் பெற்றுள்ளன. இதைத் தடுக்க அரசும் சமூக அமைப்புகளும் பல்வேறு விழிப்புணர்வு மற்றும் ஆதரவு திட்டங்களை முன்னெடுத்து வருகின்றன.