கிரான்ஸ்–மொன்டானா தீ விபத்து: ஒரு மாதம் கடந்தும் தொடரும் சிகிச்சை

சுவிட்சர்லாந்தின் வலைஸ் பகுதியில் உள்ள கிரான்ஸ்–மொன்டானா நகரில், புத்தாண்டு தினத்தன்று ‘Le Constellation’ பாரில் ஏற்பட்ட பயங்கர தீ விபத்துக்கு ஒரு மாதம் நிறைவடைந்துள்ள நிலையில், இன்னும் 23 பேர் சுவிஸ் மருத்துவமனைகளில் சிகிச்சை பெற்று வருவதாக அதிகாரிகள் தெரிவித்துள்ளனர். மேலும், காயமடைந்த சிலர் தற்போது மறுவாழ்வு சிகிச்சை மையங்களுக்கு மாற்றப்பட்டுள்ளனர்.

இதனுடன், சுவிட்சர்லாந்துக்கு வெளியே பல்வேறு நாடுகளில் தற்போது 41 பேர் சிகிச்சை பெற்று வருவதாகவும், அவர்களில் 19 பேர் சுவிஸ் குடிமக்கள் என்பதும் குறிப்பிடத்தக்கது. இந்த விபத்தில் உயிரிழந்தோர் எண்ணிக்கை 41 ஆக உயர்ந்துள்ள நிலையில், அவர்களில் 23 பேர் சுவிஸ் குடிமக்கள் என உறுதிப்படுத்தப்பட்டுள்ளது. மொத்தமாக 115 பேர் இந்த தீ விபத்தில் காயமடைந்துள்ளனர்.

கடந்த இரண்டு வாரங்களில், மருத்துவமனைகளில் இருந்து வெளியேற்றப்பட்ட பலர், பெல்லிகோன் மற்றும் சியோன் நகரங்களில் உள்ள SUVA மறுவாழ்வு மையங்கள் உள்ளிட்ட சிறப்பு சிகிச்சை நிலையங்களுக்கு மாற்றப்பட்டுள்ளனர். எனினும், துல்லியமான எண்ணிக்கை வெளியிடப்படவில்லை.

லௌசான் பல்கலைக்கழக மருத்துவமனை (CHUV) கடந்த ஒரு மாதமாக தொடர்ந்து 9 நோயாளிகள் சிகிச்சை பெற்று வருவதாக தெரிவித்துள்ளது. அதேவேளை, ஜெனீவா பல்கலைக்கழக மருத்துவமனைகள் (HUG) தற்போது எந்த நோயாளியும் அனுமதியில் இல்லை என்றும் அறிவிக்கப்பட்டுள்ளது.

நோயாளிகளின் இருப்பிடத்தை வைத்து அவர்களை அடையாளம் காணும் அபாயம் இருப்பதாகக் கூறி, சில மருத்துவமனைகள் விரிவான விவரங்களை வெளியிட மறுத்துள்ளன. இருப்பினும், தேசிய பேரிடர் மருத்துவ வலையமைப்பான KATAMED தகவலின்படி, சியோனில் இன்னும் நான்கு பேர் சிகிச்சையில் உள்ளனர்.

ஜெர்மன் மொழிப் பகுதிகளில், சூரிச் பல்கலைக்கழக மருத்துவமனையில் ஐந்து பேர் தொடர்ந்து சிகிச்சை பெற்று வருவதாகவும், அவர்கள் இன்னும் தீவிர நிலையில் உள்ளதாகவும் தெரிவிக்கப்பட்டுள்ளது. இதேபோல், சூரிச் குழந்தைகள் மருத்துவமனையில் ஐந்து சிறுவர்கள் சிகிச்சை பெற்று வருகின்றனர். அவர்களில் இருவர் தீவிர சிகிச்சைப் பிரிவில் இருப்பதாக மருத்துவமனை நிர்வாகம் தெரிவித்துள்ளது.

முன்னதாக சென்ட்கேலன் பல்கலைக்கழக மருத்துவமனையில் சிகிச்சை பெற்று வந்த வலைஸ் பகுதியைச் சேர்ந்த இரு சகோதரிகள், தற்போது பிரெஞ்சு மொழிப் பகுதிகளில் உள்ள மறுவாழ்வு மையங்களுக்கு மாற்றப்பட்டுள்ளனர். அவர்களில் ஒருவர் மோர்ஜ்ஸ் நகரிலும், மற்றொருவர் சியோனிலும் சிகிச்சை பெற்று வருகிறார்.

ஜனவரி 19 அன்று வெளியிடப்பட்ட கணக்குகளுடன் ஒப்பிடுகையில், தற்போது வெளிநாடுகளில் சிகிச்சை பெறும் சுவிஸ் குடிமக்களின் எண்ணிக்கை அதிகரித்துள்ளதாக அதிகாரிகள் கூறுகின்றனர். கிரான்ஸ்–மொன்டானா தீ விபத்தில் காயமடைந்த 19 சுவிஸ் குடிமக்கள் தற்போது சுவிட்சர்லாந்துக்கு வெளியே சிகிச்சை பெற்று வருகின்றனர்.

மொத்தமாக, இந்த விபத்தில் பாதிக்கப்பட்ட 41 பேர் ஜெர்மனி (7 பேர்), பெல்ஜியம் (5 பேர்), பிரான்ஸ் (17 பேர்) மற்றும் இத்தாலி (12 பேர்) ஆகிய நாடுகளில் சிகிச்சை பெற்று வருவதாக தெரிவிக்கப்பட்டுள்ளது. தீ விபத்தின் தாக்கம் இன்னும் முழுமையாக நீங்காத நிலையில், பலர் நீண்டகால சிகிச்சை மற்றும் மறுவாழ்வு பாதையில் பயணித்து வருகின்றனர்.