கிரான்ஸ்-மொண்டானா தீ விபத்து: பாதிக்கப்பட்டவர்களுக்கு நிதியுதவி வழங்க அரசு முடிவு

சுவிட்சர்லாந்தின் வலைஸ் கன்டோனல் அரசு, கிரான்ஸ்-மொண்டானா தீ விபத்தால் பாதிக்கப்பட்டவர்களுக்கு உதவும் வகையில் புதிய நடவடிக்கையை மேற்கொள்ள திட்டமிட்டுள்ளதாக செவ்வாய்க்கிழமை வெளியிட்ட செய்திக்குறிப்பில் அறிவித்துள்ளது. எனினும், இந்த முன்மொழியப்பட்ட நடவடிக்கையின் விரிவான அம்சங்கள் இன்னும் இறுதி செய்யப்படவில்லை எனவும் தெரிவிக்கப்பட்டுள்ளது.

அதே நேரத்தில், தீ விபத்தில் பாதிக்கப்பட்டவர்கள் எதிர்கொள்ளும் நிர்வாக மற்றும் சட்ட தொடர்பான நடைமுறைகளில் அவர்களுக்கு ஆதரவளிக்கும் நோக்கில், பாதிக்கப்பட்டோர் ஆதரவு மையங்கள் மூலம் உதவிகளை வழங்க வலைஸ் கன்டோனல் அரசு முடிவு செய்துள்ளதாக கூறப்பட்டுள்ளது. இவ்வகை மையங்கள் மூலம் தேவையான ஆலோசனைகள் மற்றும் வழிகாட்டுதல்கள் வழங்கப்படும் என அதிகாரிகள் தெரிவித்துள்ளனர்.

Crans-Montana பகுதியில் அமைந்துள்ள “Le Constellation” என்ற மதுபான விடுதியில் புத்தாண்டு தினத்தன்று ஏற்பட்ட தீ விபத்தில் 40 பேர் உயிரிழந்தனர். மேலும், 116 பேர் காயமடைந்தனர். இவர்களில் 83 பேர் திங்கட்கிழமை நிலவரப்படி இன்னும் மருத்துவமனைகளில் சிகிச்சை பெற்று வந்ததாக அதிகாரப்பூர்வ தகவல்கள் தெரிவிக்கின்றன.

இந்த துயர சம்பவம் சுவிட்சர்லாந்து முழுவதும் பெரும் அதிர்வலைகளை ஏற்படுத்தியுள்ள நிலையில், பாதிக்கப்பட்ட குடும்பங்களுக்கு அரசு தரப்பிலிருந்து கிடைக்கும் ஆதரவு மிக முக்கியமானதாக பார்க்கப்படுகிறது. தீ விபத்து தொடர்பான விசாரணைகள் தொடர்ந்து நடைபெற்று வரும் சூழலில், வலைஸ் கன்டோனல் அரசின் இந்த அறிவிப்பு பாதிக்கப்பட்டவர்களுக்கு ஓரளவு நம்பிக்கையை ஏற்படுத்தியுள்ளது.

© KeystoneSDA