கிரான்ஸ்-மொண்டானா புத்தாண்டு தீ விபத்து: புதிய அதிர்ச்சி தகவல்கள்

சுவிட்சர்லாந்தின் Crans-Montana (Crans-Montana) பகுதியில் புத்தாண்டு தினத்தில் நிகழ்ந்த கொடூரமான தீ விபத்தில் 40 இளம் உயிர்கள் பலியான சம்பவம் தொடர்பாக, தற்போது மேலும் புதிய மற்றும் அதிர்ச்சி அளிக்கும் தகவல்கள் வெளிவந்துள்ளன. இந்த விபத்து குறித்து நடைபெற்று வரும் விசாரணைகளின் போது, சம்பவம் நடந்த “Le Constellation” என்ற பாரின் மேலாளர் ஜாக் மொரெட்டி, தரைத் தளத்தில் உள்ள சேவை நுழைவுக் கதவு பூட்டப்பட்டிருந்ததை உறுதிப்படுத்தியதாக தகவல் வெளியாகியுள்ளது.

இந்த தகவலை, சுவிட்சர்லாந்தின் பிரெஞ்சு மொழி தொலைக்காட்சி சேனலான RTS (Radio Télévision Suisse) தனது விசாரணை குழுவின் மூலம், ரகசிய ஆதாரங்களை மேற்கோள் காட்டி வெளியிட்டுள்ளது. ஆரம்பத்தில், அடித்தளத்தில் உள்ள அவசர வெளியேற்றக் கதவு பூட்டப்பட்டதாக மொரெட்டி ஒப்புக்கொண்டதாக RTS செய்தி வெளியிட்டிருந்தது. பின்னர், அந்த தகவல் திருத்தப்பட்டு, பூட்டப்பட்டிருந்தது தரைத் தள சேவை கதவு என்பதே சரியான தகவல் என தெரிவிக்கப்பட்டுள்ளது.

தீ விபத்துக்குப் பிறகு சம்பவ இடத்துக்கு வந்த மொரெட்டி, அந்த கதவின் முன்பாக பல உயிரற்ற உடல்கள் குவிந்து கிடந்ததை பார்த்ததாகவும் விசாரணையில் கூறியுள்ளார். இதுவே, வெளியேற முடியாமல் பலர் சிக்கிக் கொண்டிருக்கலாம் என்ற சந்தேகத்தை மேலும் வலுப்படுத்தியுள்ளது.

இதனுடன், அந்த பாரில் பொருத்தப்பட்டிருந்த ஒலி தடுக்கக் கூடிய ஃபோம் பிளாஸ்டிக் பலகைகளை தானே நிறுவியதாகவும் மொரெட்டி ஒப்புக்கொண்டுள்ளார். சமூக வலைதளங்களில் கடந்த சில நாட்களாக பரவி வரும் பல வீடியோக்களில், இந்த பலகைகள் சில விநாடிகளில் எளிதாக தீப்பிடித்தது தெளிவாகக் காணப்படுகிறது. இது தீ வேகமாக பரவ முக்கிய காரணமாக இருந்திருக்கலாம் என சந்தேகிக்கப்படுகிறது.

இந்த நிலையில், கடந்த வெள்ளிக்கிழமை, ஜனவரி 9ஆம் தேதி, ஜாக் மொரெட்டி முன்னெச்சரிக்கை காவலில் வைக்கப்பட்டுள்ளார். அவர் தப்பிச் செல்லும் அபாயம் இருப்பதாக கருதி, வலைஸ் மாநில பொது வழக்கறிஞர் அலுவலகம் இந்த நடவடிக்கையை எடுத்துள்ளது. மொரெட்டி மற்றும் அவரது மனைவி ஜெசிகா மரிக் ஆகிய இருவரும், தவறுதலால் நிகழ்ந்த கொலை, தவறுதலால் தீ விபத்து ஏற்படுத்தல் மற்றும் தவறுதலால் காயம் விளைவித்தல் ஆகிய குற்றச்சாட்டுகளின் கீழ் விசாரணை எதிர்கொண்டு வருகின்றனர்.

RTS மற்றும் பிற ஊடகங்களில் வெளியான சாட்சியங்கள் அடிப்படையில், இந்த வழக்கை “நோக்கமுள்ள அலட்சியத்தால் நிகழ்ந்த கொலை” என்ற கடுமையான பிரிவின் கீழ் கொண்டு வர வேண்டுமா என்பதையும் அரசு வழக்கறிஞர்கள் பரிசீலித்து வருவதாக தெரிவிக்கப்பட்டுள்ளது.

ஆறு மணி நேரத்துக்கும் மேலாக நடைபெற்ற விசாரணையை, மூன்று அரசு வழக்கறிஞர்கள் முன்னெடுத்தனர். இதில் இந்த வழக்கின் பிரதான விசாரணையாளர் கத்தரீன் செப்பி மற்றும் பொது வழக்கறிஞர் பீட்ரிஸ் பிலூட் ஆகியோரும் பங்கேற்றனர். விசாரணையின் போது, தம்பதியினர் தங்களின் தனிப்பட்ட நிலை குறித்து விளக்கமளித்ததாகவும், அவர்கள் இருவரும் ஒத்துழைப்புடன் நடந்துகொண்டதாகவும் அதிகாரிகள் தெரிவித்துள்ளனர்.

இந்த கொடூரமான விபத்து தொடர்பான முழு உண்மை விவரங்கள், வரவிருக்கும் நாட்களில் வலைஸ் மாநில நீதித்துறையின் மூலம் தெளிவாக வெளிவரும் என எதிர்பார்க்கப்படுகிறது. பலியானவர்களின் குடும்பங்களை பிரதிநிதித்துவப்படுத்தும் வழக்கறிஞர்களும் விசாரணை அமர்வில் பங்கேற்று கேள்விகள் எழுப்பியுள்ளனர்.

© KeystoneSDA