ஸ்விட்சர்லாந்தில் ஆன்லைன் விற்பனை தளங்களில் அதிகரிக்கும் மோசடி முயற்சிகள்

ரிக்கார்டோ, டுட்டி(tutti), அனிபிஸ் மற்றும் பேஸ்புக் Marketplace போன்ற பிரபல ஆன்லைன் விற்பனை தளங்களில் போலி விளம்பரங்கள் தொடர்ந்து அதிகரித்து வருவதாக போலீஸ் எச்சரிக்கிறது. மிகக் குறைந்த விலையில் விரும்பத்தக்க பொருட்களை வழங்குவதாகக் கூறி, விற்பனையாளர்கள் தங்களை சுவிஸ் நாட்டைச் சேர்ந்தவர்கள் போல காட்டி, உண்மையான புகைப்படங்கள், சுவிஸ் தொலைபேசி எண்கள், IBAN விவரங்கள், அடையாள அட்டைகள் போன்றவற்றையும் பகிர்ந்து நம்பிக்கை ஏற்படுத்துகிறார்கள்.

ஆனால் இது அனைத்தும் மிக நுட்பமான ஏமாற்று வேலை. வாங்குபவர் தொடர்பு கொண்டதும், “வேறு ஒருவர் ஆர்வமாக உள்ளார்”, “அவசரம், உடனே பணம் அனுப்புங்கள்” போன்ற அழுத்தம் கொடுத்து விரைவாக பணத்தை அனுப்பச் செய்கிறார்கள். பொதுவாக TWINT அல்லது வங்கி பரிவர்த்தனை மூலம் முன்பணம் கேட்டுக்கொள்கிறார்கள். பணம் சென்றதும் தொடர்பு துண்டிக்கப்பட்டு, பொருள் ஒருபோதும் கிடைக்காது.

இத்தகைய மோசடிகள் ஸ்விட்சர்லாந்தில் ஆண்டுதோறும் அதிகரித்து வருவதாக அதிகாரிகள் தெரிவிக்கின்றனர். குறிப்பாக அதிக தேவை உள்ள மொபைல் போன்கள், கேமிங் கன்சோல்கள், மின் சாதனங்கள், சைக்கிள்கள் போன்ற பொருட்கள் அதிகம் குறிவைக்கப்படுகின்றன.

போலீஸ் பொதுமக்களுக்கு வழங்கும் முக்கிய அறிவுரைகள்:

சுவிஸ் எண்கள், IBAN அல்லது அடையாள அட்டையை அனுப்புகிறார்கள் என்பதால் நம்பிக்கைக்குள்ளாக வேண்டாம். இவை எல்லாம் போலியாக உருவாக்கப்படலாம். முடிந்தவரை பொருளை நேரடியாகப் பார்த்து, நேரில் மட்டுமே பரிவர்த்தனை செய்ய வேண்டும். சந்தேகமான விளம்பரங்களை உடனே அந்தத் தளத்திற்கே புகார் செய்ய வேண்டும்.

ஏற்கெனவே பணம் அனுப்பப்பட்டிருந்தால், உடனடியாக உங்கள் வங்கியையோ TWINT ஆதரவையோ தொடர்புகொண்டு பரிவர்த்தனையை நிறுத்தச் சொல்ல வேண்டும். பெரும்பாலும் தாமதம் மோசடிப்பவர்களுக்கு வாய்ப்பாகிவிடும்.

பாசல்-லான்ட்ஷாஃப் போலீஸ் பொதுமக்களிடம் விழிப்புணர்வுடன் இருக்கும்படி கேட்டுக்கொண்டு, அனைவருக்கும் ஒரு பாதுகாப்பான வார இறுதியைத் தெரிவித்துள்ளது.

© Kapo Basel Landschaft