ட்யூபென்டார்ஃப் (Dubendorf) நகரில் மூதாட்டியை குறிவைத்த தந்திரத் திருட்டு – இருவர் கைது

சுவிட்சர்லாந்தின் Zürich கன்டோனில் உள்ள Dübendorf நகரில், தந்திரமான முறையில் திருட்டு செய்ததாக சந்தேகிக்கப்படும் இரண்டு ஆண்களை கன்டோன் பொலிசார் புதன்கிழமை பிற்பகல் 2025 டிசம்பர் 17 அன்று கைது செய்துள்ளனர்.

பொலிசார் தெரிவித்ததன்படி, மாலை சுமார் 4 மணியளவில் Chilbiplatz பகுதியில் சந்தேகமாக நடந்து கொண்டிருந்த இரண்டு நபர்களை கண்காணித்தனர். அவர்கள் வங்கி வாடிக்கையாளர்களை கவனித்து வருவதை அதிகாரிகள் கண்டுள்ளனர். அந்த நேரத்தில், ஓய்வுபெற்ற பெண் ஒருவர் வங்கி ஏடிஎமில் இருந்து பணம் எடுத்துவிட்டு, தமது வாகனத்தை நோக்கிச் சென்றுள்ளார்.

அந்த பெண் பணம் உள்ள கைப்பையை காரின் பின்சீட்டில் வைத்து, தனது ரோலேட்டரை வாகனத்தின் டிக்கியில் வைக்க சென்றபோது, இரு நபர்களும் அவரைப் பின்தொடர்ந்துள்ளனர். அப்போது ஒருவன் வழி கேட்பது போல பேசித் திசைதிருப்ப, மற்றவன் பயணியர் பக்க கதவை மெதுவாகத் திறந்து, கைப்பையில் இருந்த பணத்தை திருடியுள்ளார்.

திருட்டு நடைபெற்ற உடனே, பொலிசார் நடவடிக்கை எடுத்து, அந்த இருவரையும் அவர்களது வாகனத்தில் தடுத்து வைத்து சோதனை செய்து கைது செய்தனர். கைது செய்யப்பட்டவர்கள் 33 மற்றும் 50 வயதுடைய ரோமேனிய குடியுரிமை கொண்டவர்கள் என தெரியவந்துள்ளது. அவர்களிடம் இருந்து 11,000 சுவிஸ் ஃப்ராங்குகள் பணம் பறிமுதல் செய்யப்பட்டு, பாதிக்கப்பட்ட மூதாட்டியிடம் மீண்டும் ஒப்படைக்கப்பட்டுள்ளது.

இந்த இருவரும் ஏற்கனவே தந்திரத் திருட்டு வழக்குகளில் தேடப்பட்டு வந்தவர்கள் எனவும், தற்போது Winterthur / Unterland அரசுத் தரப்பு வழக்கறிஞர் அலுவலகத்தில் முன்னிலையாக வேண்டியுள்ளதாகவும் பொலிசார் தெரிவித்துள்ளனர். இந்த சம்பவம், பொது இடங்களில் குறிப்பாக வங்கிகளைச் சுற்றியுள்ள பகுதிகளில் முதியவர்கள் கூடுதல் எச்சரிக்கையுடன் இருக்க வேண்டும் என்ற எச்சரிக்கையாகவும் பார்க்கப்படுகிறது.

© Kapo ZH