சூரிச்சில் யூத விரோத தாக்குதல்: சந்தேக நபர் கைது

சுவிட்சர்லாந்தின் சூரிச்சில் யூத விரோத தாக்குதல் சம்பவம் தொடர்பாக ஒருவர் கைது செய்யப்பட்டுள்ளதாக காவல் துறை தெரிவித்துள்ளது. இந்த சம்பவம் திங்கட்கிழமை இரவு சுமார் 8.15 மணியளவில் Manessestrasse பகுதியில் நடந்துள்ளது.

அங்கு உடல் மோதல் நடைபெறுவதாக தகவல் கிடைத்ததைத் தொடர்ந்து, அவசர சேவையினர் சம்பவ இடத்துக்கு விரைந்து சென்றனர். அவர்கள் வந்தபோது, பலர் ஒன்றாக சேர்ந்து ஒரு நபரை தரையில் தடுத்து வைத்திருந்தனர். இதுவரை கிடைத்த தகவல்களின்படி, அந்த நபர் தெருவில் நடந்துகொண்டிருந்த 26 வயதுடைய ஒரு ஆர்தடாக்ஸ் யூத இளைஞரை தொடர்ந்து குத்தி தாக்கியுள்ளார். தாக்குதலில் பாதிக்கப்பட்ட நபருக்கு லேசான காயங்கள் ஏற்பட்டுள்ளதாக தெரிவிக்கப்பட்டுள்ளது.

சம்பவத்தை நேரில் பார்த்த அப்பகுதியில் இருந்த சிலர் உடனடியாக தலையிட்டு, தாக்குதல் நடத்தியதாக கூறப்படும் நபரை அடக்கி, காவல் துறை வரும்வரை பிடித்து வைத்துள்ளனர். காவல்துறையினர் சம்பவ இடத்துக்கு வந்த பிறகும், அந்த நபர் அவர்களிடம் தீவிரமாகவும் ஆக்கிரமணமான முறையிலும் நடந்துகொண்டதாக கூறப்படுகிறது. மேலும், அவர் தொடர்ந்து அவதூறான மற்றும் யூத விரோத கருத்துகளை வெளியிட்டதாகவும் தெரிவிக்கப்பட்டுள்ளது.

கைது செய்யப்பட்ட நபர் 40 வயதுடைய கொசோவோ நாட்டைச் சேர்ந்தவர் என்றும், சுவிட்சர்லாந்தில் நிரந்தர வசிப்பிடம் இல்லாதவர் என்றும் Stadtpolizei Zürich தெரிவித்துள்ளது. சம்பவம் தொடர்பான விசாரணைகள் தொடர்ந்து நடைபெற்று வருவதாகவும், இனவெறி மற்றும் மத அடிப்படையிலான வன்முறைகளை காவல் துறை மிகக் கடுமையாகக் கண்காணித்து வருவதாகவும் அதிகாரிகள் தெரிவித்துள்ளனர்.

© Kapo ZH