சுவிட்சர்லாந்தில் நாய் பராமரிப்பு சட்டத்தில் மாற்றம்: புதிய பயிற்சி விதிகள் அறிமுகம்

சுவிட்சர்லாந்தின் மாநில அரசு, நாய்களை வளர்ப்பதற்கான தற்போதைய சட்டத்தில் பகுதி திருத்தம் செய்யும் வரைவு சட்டத்தை பொதுமக்களின் கருத்துக்காக வெளியிட்டுள்ளது. இந்த மாற்றத்தின் முக்கிய நோக்கம், பொது இடங்களில் பாதுகாப்பை மேம்படுத்துவதும், விலங்குகளின் நலனை உறுதிசெய்வதுமாகும் என்று அரசு வியாழக்கிழமை வெளியிட்ட அறிவிப்பில் தெரிவித்துள்ளது.

புதிய விதிப்படி, நாயை முதன்முறையாக வளர்க்கும் நபர்கள், கடந்த பத்து ஆண்டுகளாக நாயை வளர்க்காதவர்கள், அல்லது வெளிநாட்டிலிருந்து நாயை கொண்டு வருபவர்கள் — அனைவரும் கட்டாயமாக ஒரு நடைமுறை நாய் பயிற்சி மற்றும் ஒழுங்கு வகுப்பில் பங்கேற்க வேண்டியிருக்கும். இதன் மூலம், நாய்களின் நடத்தை மற்றும் பொது இடங்களில் அவற்றின் கட்டுப்பாடு மேம்படும் என எதிர்பார்க்கப்படுகிறது.

மேலும், காவல்துறை, மீட்பு சேவை, குருடர்களுக்கான வழிகாட்டி நாய்கள், மாற்றுத் திறனாளிகள் மற்றும் உதவி நாய்கள் ஆகியவை பயிற்சி, பணி அல்லது அவசரச் சூழ்நிலைகளில் இருக்கும்போது தாமாகவே கயிறு கட்டுப்பாட்டிலிருந்து விலக்கப்படும் என அரசின் வரைவு குறிப்பிடுகிறது. இதே நேரத்தில், ‘நுட்ப நாய்கள்’ என்ற வகைபாட்டின் வரையறையும் சம்மந்தப்பட்ட கூட்டாட்சியின் சட்டத்துடன் ஒத்திசைக்கப்படும். இதில் தற்போது பொது சேவை நாய்கள், வழிகாட்டி நாய்கள், மாற்றுத் திறனாளி நாய்கள் மற்றும் மீட்பு நாய்கள் ஆகியவை சேர்க்கப்படும்.

சில நாடுகளில் போல நாய் இனங்களுக்கான தடை அல்லது அனுமதி பெறும் கட்டாயம் சுவிஸ் அரசு கொண்டு வரப்போவதில்லை என்றும் தெரிவிக்கப்பட்டுள்ளது. ஆனால், அதிக தாக்குதல் மனப்பான்மையைக் காட்டும் அல்லது ஆபத்தான நடத்தை கொண்ட நாய்களுக்கு மாநில விலங்கு மருத்துவர்கள் நடவடிக்கை எடுக்க சட்ட அடிப்படை உருவாக்கப்படும்.

முன்னதாக இருந்த கட்டாய நாய் காப்பீட்டு விதிமுறையும் நீக்கப்படும் என அறிவிக்கப்பட்டுள்ளது. இனி நாய் உரிமையாளர்கள் தாங்களே தங்களது பொறுப்பில் காப்பீட்டை ஏற்பாடு செய்ய வேண்டியிருக்கும்.

இந்த சட்ட வரைவு குறித்து பொது ஆலோசனை (Vernehmlassung) 2026 பிப்ரவரி 20 ஆம் தேதி வரை நடைபெறும். அதன் பிறகு மாநில நாடாளுமன்றம் இந்த முன்மொழிவை பரிசீலிக்கவுள்ளது.

சுவிட்சர்லாந்தில் சமீப ஆண்டுகளில் நாய்களின் எண்ணிக்கை அதிகரித்து வருவதால், பொது இடங்களில் பாதுகாப்பு மற்றும் விலங்குகளின் நலனுக்கான கட்டுப்பாடுகள் குறித்த விவாதங்கள் தீவிரமாகி வருகின்றன. இந்த புதிய சட்ட மாற்றம் அந்தப் பின்னணியில் ஒரு முக்கியமான முன்னேற்றமாக பார்க்கப்படுகிறது.

© BLick