சுவிட்சர்லாந்தில் ஐபோன் ஆதிக்கம்… ஆனாலும் பயனர்களின் மனதில் ஒரு சந்தேகம்

சுவிட்சர்லாந்தில் ஒரு சாதாரண நாளை நினைத்துப் பாருங்கள்… ரயிலில் பயணம் செய்பவர்கள், கஃபேவில் அமர்ந்திருப்பவர்கள், அலுவலகங்களில் வேலை பார்க்கும் மக்கள்… அவர்களிடம் இருக்கும் மொபைலை கவனித்தால், பெரும்பாலும் ஒரே பதில் கிடைக்கும் – ஐபோன். சமீபத்திய Comparis ஆய்வின் படி, நாட்டில் பயன்படுத்தப்படும் ஸ்மார்ட்போன்களில் பாதிக்கு அருகிலானவை Apple நிறுவனத்தின் iPhoneகளாக உள்ளன.

இதற்கு அடுத்ததாக Samsung 37.2 சதவீத பங்குடன் வருகிறது. ஆனால் Xiaomi, Google, Oppo, Huawei, Sony போன்ற மற்ற பிராண்டுகள் சுவிட்சர்லாந்தில் மிகவும் குறைவாகவே காணப்படுகின்றன. இதற்கான காரணம் என்ன? நிபுணர்கள் கூறுவது என்னவெனில், அதிக வருமானம் கொண்ட இந்த நாட்டில் iPhone-ன் உயர்ந்த விலை பெரிய தடையாக இல்லை. மற்ற நாடுகளில் போல “குறைந்த விலை மாடல்கள் இல்லாதது” இங்கே பெரிய பிரச்சினையாக பார்க்கப்படவில்லை.

ஆனால் கதை இங்கே முடிவதில்லை. iPhone பயன்படுத்துபவர்கள் அடுத்த மொபைல் வாங்கும்போது சராசரியாக 708 ஃப்ராங்க் செலவிடத் தயாராக இருக்கிறார்கள். அதே நேரத்தில் Android பயனர்கள் சுமார் 452 ஃப்ராங்க் மட்டுமே செலவிட விரும்புகிறார்கள். மொத்தத்தில், சுவிட்சர்லாந்தில் ஒரு புதிய ஸ்மார்ட்போனுக்காக மக்கள் சராசரியாக 574 ஃப்ராங்க் செலவிட திட்டமிடுகிறார்கள். இது ஐந்து ஆண்டுகளுக்கு முன்பைவிட கணிசமான உயர்வாகும்.

விலை உயர்வு காரணமாக, மக்கள் தங்கள் மொபைல்களை நீண்ட காலம் பயன்படுத்தத் தொடங்கியுள்ளனர். 65 சதவீதம் பேர் “புதியது வாங்காமல் இன்னும் சில ஆண்டுகள் இதையே பயன்படுத்தலாம்” என்று நினைக்கிறார்கள். குறிப்பாக ரோமாண்டி மற்றும் டிசினோ கன்டோன் பகுதிகளில் இந்த எண்ணிக்கை இன்னும் அதிகமாக உள்ளது. 2020இல் நான்கு ஆண்டுகளுக்கு மேல் ஒரே மொபைலை பயன்படுத்தியவர்கள் 8.9 சதவீதம் மட்டுமே இருந்த நிலையில், 2025இல் அது 15.7 சதவீதமாக உயர்ந்துள்ளது.

ஆனால் இந்தக் கதையில் ஒரு சின்ன திருப்பம் இருக்கிறது. சந்தையில் iPhone முன்னிலையில் இருந்தாலும், பயனர் திருப்தியில் அது பின்னிலையில் உள்ளது. Apple பயனர்களில் 34.1 சதவீதம் பேர் மட்டுமே “முழுமையாக திருப்தி” என்று கூறியுள்ளனர். அதே நேரத்தில் Android பயனர்களில் இந்த விகிதம் 42.8 சதவீதமாக உள்ளது. குறிப்பாக பேட்டரி ஆயுள், கேமரா தரம் மற்றும் சேமிப்பு இடம் குறித்த குறைகள் அதிகமாக முன்வைக்கப்படுகின்றன.

அதாவது, சுவிட்சர்லாந்தில் iPhone ஒரு ஸ்டேட்டஸ் சின்னமாக இருந்தாலும், பயனர்களின் மனதில் இன்னும் ஒரு கேள்வி மிஞ்சியே இருக்கிறது – “இதற்காக செலுத்தும் விலைக்கு இது உண்மையில் மதிப்பானதா?”

நீங்கள் ஐபோன் பரியரா இல்லை ஆன்ராய்ட் பிரியரா என்பதை மறக்காமல் காமண்ட் பன்னிட்டு போங்க..

NAU