லூசேர்ன் கன்டோனில் கடுமையான விபத்து: ஒருவர் உயிரிழப்பு, நால்வர் தீவிர காயம்

சுவிட்சர்லாந்தின் லூசேர்ன் (Lucerne) கன்டோனில் உள்ள எஷோல்ஸ்மாட் (Escholzmatt) பகுதியில் இன்று காலை இடம்பெற்ற கடுமையான சாலை விபத்தில் ஒருவர் உயிரிழந்ததுடன், மேலும் நால்வர் கடுமையாக காயமடைந்துள்ளனர். இந்த சம்பவம் தொடர்பாக ஒருவரை போலீசார் கைது செய்துள்ளனர்.

லூசேர்ன் கன்டோனல் காவல் துறை தெரிவித்ததன்படி, இன்று காலை சுமார் 7.15 மணியளவில் ஒரு கார் எஷோல்ஸ்மாட் நகரிலிருந்து ஷூப்ஃப்ஹைம் (Schüpfheim) நோக்கி பயணம் செய்து கொண்டிருந்தது. Lehn என்ற இடத்துக்கு அருகில் ஓட்டுநர் மற்றொரு வாகனத்தை முந்திச் செல்ல முயன்றபோது தனது வாகனத்தின் கட்டுப்பாட்டை இழந்ததாக தெரிவிக்கப்படுகிறது. அதன் பின்னர் கார் வழுவி எதிர்திசையில் சரியாக வந்துகொண்டிருந்த மற்றொரு வாகனத்துடன் நேருக்கு நேர் மோதி விபத்துக்குள்ளானது.

இந்த மோதலில் அந்த வாகனத்தை ஓட்டிய நபர் கடுமையாக காயமடைந்தார். எதிர்திசையில் வந்த காரில் இருந்த 33 வயதுடைய ஒருவர் சம்பவ இடத்திலேயே உயிரிழந்ததாக அதிகாரிகள் தெரிவித்துள்ளனர். அதே காரில் இருந்த மேலும் மூவர் கடுமையான காயங்களுடன் மருத்துவமனைக்கு கொண்டு செல்லப்பட்டனர்.

இந்த விபத்து எவ்வாறு ஏற்பட்டது என்பது குறித்து தற்போது விசாரணை நடைபெற்று வருகிறது. விசாரணையின் ஒரு பகுதியாக ஒருவரை போலீசார் கைது செய்துள்ளதாகவும், இந்த வழக்கை Sursee அரச வழக்கறிஞர் அலுவலகம் விசாரித்து வருவதாகவும் தெரிவிக்கப்பட்டுள்ளது.

சம்பவ இடத்திற்கு போலீசாருடன் சேர்ந்து அவசர மருத்துவ சேவைகள், ஷூப்ஃப்ஹைம், எஷோல்ஸ்மாட்-மார்பாக் மற்றும் எம்மென் பகுதிகளின் தீயணைப்பு படையினரும் விரைந்து வந்தனர். விபத்து காரணமாக ஷூப்ஃப்ஹைம் மற்றும் எஷோல்ஸ்மாட் இடையிலான முக்கிய சாலை பல மணி நேரங்கள் போக்குவரத்திற்காக மூடப்பட்டிருந்தது.

© Kapo LU