பேர்ன் உயிரியல் பூங்காவில் இடப்பற்றாக்குறை சவால் – புதிய சிக்கல்

சுவிட்சர்லாந்தின் பேர்ன் (Bern) நகரில் உள்ள Tierpark Dählhölzli (“டியர்பார்க் டேல்ஹோல்ஸ்லி”) உயிரியல் பூங்கா தற்போது ஒரு சிக்கலான நிலையை எதிர்கொண்டு வருகிறது. மேம்பட்ட பராமரிப்பு மற்றும் சத்துணவு வசதிகள் காரணமாக அங்குள்ள விலங்குகள் முன்பைவிட நீண்ட காலம் உயிர்வாழுகின்றன. ஆனால் இந்த நீண்ட ஆயுள், அடுத்த தலைமுறை விலங்குகளுக்கான இடத்தை குறைக்கும் பிரச்சினையை உருவாக்கியுள்ளது.

University of Zurich வெளியிட்ட புதிய ஆய்வு, உலகம் முழுவதும் உள்ள உயிரியல் பூங்காக்களில் வயதான விலங்குகளின் எண்ணிக்கை அதிகரித்து வருவது பாதுகாப்பு மற்றும் இனப் பாதுகாப்பு இலக்குகளை பாதிக்கக்கூடும் என எச்சரிக்கிறது. குறிப்பாக கட்டுப்படுத்தப்பட்ட இனப்பெருக்கத் திட்டங்கள் செயல்படுத்தப்படும் சூழலில், இடவசதி முக்கிய காரணியாக மாறியுள்ளது.

பேர்ன் நகரின் டெர் புண்ட் (Der Bund) நாளிதழுக்கு அளித்த பேட்டியில் விலங்கு மருத்துவர் Stefan Hoby, எதிர்காலத்தில் புதிய குட்டிகளுக்கான இடத்தை உருவாக்குவதற்காக வயதான சில விலங்குகளை கருணை மரணத்திற்கு உட்படுத்த வேண்டிய சூழ்நிலை அதிகரிக்கலாம் என்று தெரிவித்துள்ளார். இந்த கருத்து சமூக வலைதளங்களில் மற்றும் விலங்கு பாதுகாப்பு வட்டாரங்களில் பரவலான விவாதத்தை ஏற்படுத்தியுள்ளது.

ஐரோப்பிய உயிரியல் பூங்காக்கள் பெரும்பாலும் காட்டு விலங்குகளை நேரடியாக பிடித்து வராமல், உள்ளக இனப்பெருக்கத் திட்டங்கள் மூலம் இனங்களை நிலைநிறுத்துவதே நோக்கமாகக் கொண்டுள்ளன. உயிரியல் பூங்கா வலையமைப்புகள் ஒருங்கிணைந்து இனவழித் தகவல்களை பரிமாறி, மரபணு பல்வகைமையை பாதுகாக்க முயற்சிக்கின்றன. ஆனால் விலங்குகள் நீண்ட ஆயுளைப் பெறுவது ஒருபுறம் வெற்றியாக இருந்தாலும், அதே நேரத்தில் பராமரிப்பு செலவுகள், மருத்துவ தேவைகள் மற்றும் இடவசதி கட்டுப்பாடுகள் போன்ற சவால்களையும் உருவாக்குகிறது.

விலங்கு நலன் மற்றும் இனப் பாதுகாப்பு என்ற இரண்டு முக்கிய இலக்குகளுக்கு இடையில் சமநிலையை பேணுவது நாளுக்கு நாள் கடினமாகி வருவதாக நிபுணர்கள் தெரிவிக்கின்றனர். குறிப்பாக அரிய மற்றும் அழிவின் விளிம்பில் உள்ள இனங்களை பாதுகாப்பது தொடர்பாக நீண்டகால திட்டமிடல் அவசியமாகியுள்ளது.  WRS