சுவிட்சர்லாந்தில் டிக்கெட் இல்லா பயணம் அதிகரிப்பு; போக்குவரத்து நிறுவனங்களுக்கு பெரும் இழப்பு

சுவிட்சர்லாந்து முழுவதும் பொது போக்குவரத்தில் டிக்கெட் இன்றி பயணம் செய்யும் சம்பவங்கள் தொடர்ந்து அதிகரித்து வருவதாக புதிய புள்ளிவிவரங்கள் தெரிவிக்கின்றன. கடந்த சில ஆண்டுகளாக இந்தப் போக்கு உயர்ந்து வரும் நிலையில், 2025 ஆம் ஆண்டில் இது மேலும் கவலைக்கிடமான அளவை எட்டியுள்ளது.

SwissPass Alliance வெளியிட்ட தகவலின்படி, 2024 ஆம் ஆண்டில் முதல் முறையாக டிக்கெட் இல்லாமல் பயணம் செய்ததாக பிடிபட்ட பயணிகளின் எண்ணிக்கை 10 லட்சத்தை கடந்தது. அதனைத் தொடர்ந்து, கடந்த ஆண்டு மட்டும் 11,73,295 பயணிகள் செல்லுபடியாகும் டிக்கெட் இல்லாமல் பயணம் செய்த நிலையில் கண்டுபிடிக்கப்பட்டுள்ளனர்.

இந்த அதிகரிப்புக்கான காரணம் குறித்து விளக்கமளித்த SwissPass Alliance அமைப்பின் பேச்சாளரான Michaela Ruoss, பொது போக்குவரத்தில் தற்போது அதிக அளவில் மற்றும் அடிக்கடி சோதனைகள் மேற்கொள்ளப்படுவதே முக்கிய காரணம் என தெரிவித்துள்ளார். இதன் காரணமாக, முன்பு கவனத்திற்கு வராத பல டிக்கெட் இல்லா பயணங்கள் இப்போது பதிவாகி வருவதாக அவர் கூறியுள்ளார்.

டிக்கெட் இன்றி பயணம் செய்வது பொதுப் போக்குவரத்து நிறுவனங்களுக்கு பெரும் நிதி இழப்பை ஏற்படுத்தி வருகிறது. 2025 ஆம் ஆண்டில் மட்டும், இந்த முறைகேடு காரணமாக சுமார் 200 மில்லியன் சுவிஸ் ஃப்ராங்க் அளவுக்கு இழப்பு ஏற்பட்டுள்ளதாக மதிப்பிடப்பட்டுள்ளது. இந்த இழப்பு, சேவையின் தரம், பராமரிப்பு செலவுகள் மற்றும் கட்டண உயர்வுகள் போன்ற விடயங்களில் தாக்கத்தை ஏற்படுத்தக்கூடும் என நிபுணர்கள் எச்சரிக்கின்றனர்.

சுவிட்சர்லாந்தில் பொதுப் போக்குவரத்து ஒரு நம்பகமான மற்றும் பரவலாகப் பயன்படுத்தப்படும் அமைப்பாக இருந்து வரும் நிலையில், டிக்கெட் இல்லா பயணங்களை கட்டுப்படுத்துவதற்காக கண்காணிப்பு நடவடிக்கைகள் மற்றும் விழிப்புணர்வு பிரச்சாரங்களை மேலும் தீவிரப்படுத்த வேண்டும் என போக்குவரத்து அதிகாரிகள் தெரிவித்து வருகின்றனர்.