லூசேர்ன் நகரில் கார் டயர்கள் திருட்டு: போர்ச்சுகீஸ் நபர் கைது

சுவிட்சர்லாந்தின் லூசேர்ன் நகரில் (Luzern) நடந்த பெரிய அளவிலான திருட்டு சம்பவம் தொடர்பாக, 35 வயதுடைய போர்ச்சுகீஸ் குடிமகனை லூசேர்ன் கன்டோனல் போலீசார் (Luzerner Polizei) கைது செய்துள்ளனர்.

கிடைத்த தகவல்களின் அடிப்படையில், குற்றச்சாட்டுக்குள்ளான இந்த நபர் 2024 மார்ச் முதல் 2025 மார்ச் வரை, லூசேர்ன் நகரில் உள்ள ஒரு கார் பழுது பார்க்கும் நிலையத்தின் (Autogarage) களஞ்சிய அறைகளில் இருந்து, முழு டயர் தொகுப்புகள் (Kompletträder) பலமுறை திருடியதாக சந்தேகிக்கப்படுகிறார். திருடப்பட்ட இந்த டயர்கள் பின்னர் மூன்றாம் நபர்களுக்கு விற்பனை செய்யப்பட்டதாகவும் போலீசார் தெரிவிக்கின்றனர்.

இந்த வழக்கில் குற்றம்சாட்டப்பட்ட நபர் 2025 ஜூலை மாதத்தில் கைது செய்யப்பட்டு, விசாரணை முடியும் வரை நீதிமன்ற உத்தரவின் பேரில் காவலில் (Untersuchungshaft) வைக்கப்பட்டுள்ளார். இதுவரை மேற்கொள்ளப்பட்ட விசாரணைகளின் படி, அவர் மொத்தமாக 64 முழு டயர் தொகுப்புகளை திருடியுள்ளதாகவும், அவற்றின் மொத்த மதிப்பு சுமார் 2 லட்சத்து 20 ஆயிரம் சுவிஸ் ஃபிராங்குகள் என மதிப்பிடப்பட்டுள்ளதாகவும் தெரியவந்துள்ளது.

இந்த திருட்டு பொருட்களை வாங்கியவர்களுக்கும், திருட்டுப் பொருள் வாங்கிய குற்றமான ‘ஹெலரை’ (Hehlerei) குற்றச்சாட்டின் கீழ் தனித்தனியாக விசாரணை தொடங்கப்பட்டுள்ளதாக போலீசார் தெரிவித்துள்ளனர். இந்த வழக்கின் முழு விசாரணையையும் லூசேர்ன் மாநில வழக்கறிஞர் அலுவலகம் (Staatsanwaltschaft Luzern) முன்னெடுத்து வருகிறது.

இந்த வழக்கில் குற்றச்சாட்டுக்குள்ளான நபருக்கு, நீதிமன்ற தீர்ப்பு வரும் வரை குற்றமற்றவர் என்ற சட்டப்பூர்வமான முன்னெண்ணம் (Unschuldsvermutung) பொருந்தும் என்பதும் அதிகாரிகள் தரப்பில் தெளிவுபடுத்தப்பட்டுள்ளது.

மூலம்: லூசேர்ன் கன்டோனல் போலீசார்