போலி போலீஸ் மோசடிகள் மீண்டும் அதிகரிப்பு: வோ கன்டோனல் போலீசார் எச்சரிக்கை

2025 ஆம் ஆண்டு இறுதியில் ஓரளவு அமைதியாக இருந்த போலி அடையாளங்களை பயன்படுத்திய மோசடி சம்பவங்கள், கடந்த சில வாரங்களாக சுவிட்சர்லாந்தில் மீண்டும் கணிசமாக அதிகரித்து வருகின்றன. குறிப்பாக, தங்களை போலீசார் என அறிமுகப்படுத்தி பணம் மற்றும் மதிப்புள்ள பொருட்களை பறிக்கும் மோசடிகள் மீண்டும் தீவிரமடைந்துள்ளதாக வாட் Kantonspolizei தெரிவித்துள்ளது.

ஜனவரி 12, 2026 தொடங்கிய வாரத்தில் மட்டும், போலி வங்கி ஊழியர்கள் அல்லது போலி போலீசார் என நடித்து மேற்கொள்ளப்பட்ட 24 மோசடி சம்பவங்களை போலீசார் பதிவு செய்துள்ளனர். இதில் 12 சம்பவங்கள் முயற்சி நிலையில் நிறுத்தப்பட்டதாகவும் தெரிவிக்கப்பட்டுள்ளது. அதிகமான புகார்கள் லௌசான் (Lausanne), நியோன் (Nyon) மற்றும் சாவினி (Savigny) பகுதிகளிலிருந்து கிடைத்துள்ளன.

இந்த சம்பவங்களால் ஏற்பட்ட மொத்த நிதி இழப்பு சுமார் 73,000 சுவிஸ் ஃப்ராங்க்களாக மதிப்பிடப்பட்டுள்ளது. இதில் மட்டும் லௌசானில் நிகழ்ந்த ஒரே ஒரு சம்பவத்திலேயே 43,000 ஃப்ராங்க் இழப்பு ஏற்பட்டுள்ளது. இதேபோன்ற மோசடி அதிகரிப்பு பிற கன்டோன்களிலும் பதிவாகி வருவதாக போலீசார் கூறுகின்றனர்.

குறிப்பிடத்தக்க மாற்றமாக, குற்றவாளிகள் தங்களின் மோசடி முறையை மாற்றியுள்ளனர். முன்பு பெரும்பாலும் போலீசார் என நடித்துவந்தவர்கள், தற்போது வங்கி ஊழியர்கள் அல்லது மருத்துவ–சமூக மையங்களில் (CMS) பணிபுரிவோர் எனவும் தங்களை அறிமுகப்படுத்தி மக்களை ஏமாற்றத் தொடங்கியுள்ளனர்.

2025 ஆம் ஆண்டில் மட்டும் இத்தகைய 925 மோசடி சம்பவங்கள் போலீசில் பதிவாகியுள்ளன. இதில் 668 முயற்சிகளாகவும், 257 சம்பவங்கள் முழுமையாக நடந்ததாகவும் தெரிவிக்கப்பட்டுள்ளது. 2024 ஆம் ஆண்டில் இதே எண்ணிக்கை 369 ஆக மட்டுமே இருந்தது என்பது குறிப்பிடத்தக்கது.

இந்த நிலையில், பொதுமக்கள் தங்களின் தனிப்பட்ட மற்றும் வங்கி தொடர்பான தகவல்களை மிகுந்த கவனத்துடன் கையாள வேண்டும் என போலீசார் வலியுறுத்தியுள்ளனர். மோசடிக்காரர்கள் பெரும்பாலும் தொலைபேசி அடைவுகளில் உள்ள பெயர், முகவரி மற்றும் நிலைநிலை தொலைபேசி எண் போன்ற தகவல்களை பயன்படுத்துவதாக எச்சரிக்கப்பட்டுள்ளது. தனியாக வாழும் மூத்த குடிமக்களின் குடும்பத்தினர் மற்றும் நெருங்கியவர்கள், வங்கி விவகாரங்களில் அவர்களுக்கு உதவி வழங்குவது அவசியம் என்றும் அறிவுறுத்தப்பட்டுள்ளது.

மேலும், போலீசார் எப்போதும் தனியார் வீடுகளுக்கு சென்று வங்கி அட்டைகள் அல்லது மதிப்புள்ள பொருட்களை சேகரிப்பதில்லை என்பதையும் அவர்கள் தெளிவாகக் கூறியுள்ளனர். தொலைபேசியில் தொடர்பு கொள்ளும் நபர்களுக்கு எந்தவிதமான தனிப்பட்ட அல்லது வங்கி தகவல்களையும் வழங்கக் கூடாது, அறியாத நபர்களிடம் வங்கி அட்டைகள், பின் எண்கள் அல்லது மதிப்புள்ள பொருட்களை ஒப்படைக்கக் கூடாது, அழைப்பாளரின் அடையாளத்தில் சந்தேகம் ஏற்பட்டால் உடனடியாக அழைப்பை நிறுத்த வேண்டும், மீண்டும் அழைக்கும் வசதியை பயன்படுத்தக் கூடாது, சந்தேகமிருந்தால் உடனடியாக போலீசாரை தொடர்பு கொள்ள வேண்டும், மேலும் இந்த மோசடி முறைகள் குறித்து சுற்றியுள்ளவர்களுக்கும் தகவல் வழங்க வேண்டும் என போலீசார் கேட்டுக்கொண்டுள்ளனர்.

இந்த மோசடிகள் தொடர்பான விழிப்புணர்வே இத்தகைய குற்றங்களைத் தடுக்கும் முக்கியமான ஆயுதமாக இருக்கும் என வோ கன்டோனல் போலீசார் தெரிவித்துள்ளனர். ©Kapo WD