டாவோஸில் சுவிட்சர்லாந்திடம் உதவி கோரிய உக்ரைன் ஜனாதிபதி செலென்ஸ்கி

போரால் கடுமையான மனிதாபிமான நெருக்கடிகளை எதிர்கொண்டு வரும் உக்ரைன் மக்களுக்கு உதவ சுவிட்சர்லாந்து ஆதரவளிக்க வேண்டும் என உக்ரைன் ஜனாதிபதி வோலோடிமிர் செலென்ஸ்கி கோரிக்கை விடுத்துள்ளார். சுவிட்சர்லாந்து அதிபர் காய் பார்மெலின் உடன் நடைபெற்ற நேரடி சந்திப்பின் போது, உக்ரைனுக்கு வழங்கக்கூடிய சுவிட்சர்லாந்தின் சாத்தியமான உதவிகள் குறித்த பட்டியலை அவர் முன்வைத்ததாக தெரிவிக்கப்பட்டுள்ளது.

உலக பொருளாதார மன்றம் நடைபெறும் டாவோஸ் நகரில் இந்த சந்திப்பு நடைபெற்றது. சுமார் 20 நிமிடங்கள் நீடித்த இந்த பேச்சுவார்த்தை டாவோஸ் காங்கிரஸ் மையத்தில் நடந்ததாகவும், இரு நாடுகளின் தலைவர்கள் இடையே நடைபெற்ற முதல் நேரடி சந்திப்பு இதுவாகும் என்றும் தெரிவிக்கப்பட்டுள்ளது.

இந்த சந்திப்பின் போது, உக்ரைன் தற்போது எதிர்கொண்டு வரும் கடுமையான சக்திவள நெருக்கடியை சமாளிக்க சுவிட்சர்லாந்து நிறுவனங்கள் உதவ முன்வர வேண்டும் என்ற கோரிக்கையும் வைக்கப்பட்டதாக பார்மெலின் ஊடகங்களுக்கு தெரிவித்தார். போர் காரணமாக மின் உற்பத்தி மற்றும் விநியோக கட்டமைப்புகள் சேதமடைந்துள்ள நிலையில், உக்ரைன் வீடுகளில் வெப்பநிலை மைனஸ் 2 முதல் 9 பாகை செல்சியஸ் வரை குறைந்துள்ளதாகவும் அவர் கூறினார். குளிர்காலத்தில் இந்த நிலை பொதுமக்களின் வாழ்வாதாரத்தை மேலும் பாதிக்கும் அபாயம் இருப்பதாகவும் அவர் எச்சரித்தார்.

பாதுகாப்பு காரணங்களால் பல பாதுகாப்பு பணியாளர்களுடன் செலென்ஸ்கி இந்த சந்திப்பில் பங்கேற்றிருந்ததாக தகவல்கள் தெரிவிக்கின்றன. இதற்கிடையில், டாவோஸில் அவர் அமெரிக்க முன்னாள் அதிபர் டொனால்ட் ட்ரம்ப் உடனும் சந்தித்து பேசினார். மேலும், உலக பொருளாதார மன்றத்தில் பங்கேற்ற அரசியல், பொருளாதார தலைவர்கள் மற்றும் பிரதிநிதிகளை நோக்கி உரையாற்றி, உக்ரைனுக்கான சர்வதேச ஆதரவு அவசியத்தை வலியுறுத்தினார்.

போரால் பாதிக்கப்பட்ட நாடுகளுக்கு மனிதாபிமானம், சக்திவளம் மற்றும் மறுசீரமைப்பு துறைகளில் நடுநிலையான சுவிட்சர்லாந்து வழங்கக்கூடிய பங்கு குறித்து இந்த சந்திப்பு முக்கியத்துவம் பெறுகிறது என அரசியல் வட்டாரங்கள் தெரிவிக்கின்றன.

© KeystoneSDA