பெர்னில் அனுமதியில்லா WEF எதிர்ப்பு போராட்டம்: 200 பேர் கண்காணிப்பு, 25 பேர் தடுத்து வைப்பு

சுவிட்சர்லாந்தின் பெர்ன் (Bern) நகரில், பிரதான ரயில் நிலையம் அமைந்துள்ள பான்ஹோஃப்ஃப்ளாட்ஸ் (Bahnhofplatz) பகுதியில் அனுமதியின்றி நடைபெற்ற உலக பொருளாதார மன்றம் (WEF – World Economic Forum) எதிர்ப்பு ஆர்ப்பாட்டம் தொடர்பாக, பெர்ன் கன்டோனல் போலீசார் (Kantonspolizei Bern) சனிக்கிழமை மாலை தங்களது நடவடிக்கைகளின் முழுமையான விபரத்தை வெளியிட்டுள்ளனர்.

சனிக்கிழமை பிற்பகல் சுமார் 3 மணியளவில், அங்கிருந்த செய்தியாளர்களின் கணிப்பின்படி சுமார் 200 பேர் Bahnhofplatz பகுதியில் ஒன்றுகூடியுள்ளனர். கூட்டத்தில் இருந்து “நாங்கள் அனைவரும் அன்டி-ஃபாசிஸ்ட்கள்” என்ற முழக்கங்கள் இத்தாலிய மொழியில் எழுப்பப்பட்டதாக தெரிவிக்கப்படுகிறது. போலீசாரின் மீண்டும் மீண்டும் வழங்கப்பட்ட எச்சரிக்கைகளையும் மீறி, சிறிது நேரத்தில் பேரணியாக மாறிய கூட்டம் அதே பகுதியைச் சுற்றி நகரத் தொடங்கியது.

பாதுகாப்பு காரணங்களால் ரயில் நிலையத்திற்கும் Bahnhofplatz பகுதிக்கும் செல்லும் அனைத்து நுழைவாயில்களும் போலீசாரால் மூடப்பட்டிருந்தன. போராட்டக்காரர்களுக்கு பிற்பகல் 4.15 மணி வரை ஆர்ப்பாட்டத்தைத் தொடர அனுமதி வழங்கப்பட்டது. அதன் பின்னர், போராட்டத்தை முடித்து இடத்தை விட்டு வெளியேறுமாறு பலமுறை அறிவுறுத்தப்பட்டது.

பலர் அந்த அறிவுறுத்தலை ஏற்றுக் கொண்டு வெளியேறினாலும், அங்கு தங்கியிருந்தவர்கள் ஹெய்லிக் கெய்ஸ்ட் தேவாலயம் (Heiliggeistkirche) அருகே போலீசாரால் சுற்றிவளைக்கப்பட்டனர். பின்னர் அனைவரிடமும் அடையாளச் சோதனைகள் மேற்கொள்ளப்பட்டன. மொத்தமாக சுமார் 200 பேர் கண்காணிக்கப்பட்டு அப்புறப்படுத்தப்பட்டனர். இதற்கிடையில், 25 பேர் தற்காலிகமாக கைது செய்யப்பட்டு மேலதிக விசாரணைகளுக்காக காவல் நிலையத்திற்கு அழைத்துச் செல்லப்பட்டனர். இவர்கள்மீது அரச பணிகளைத் தடுக்கும் செயல், அரச அதிகாரிகளுக்கு எதிரான வன்முறை அல்லது மிரட்டல் உள்ளிட்ட சந்தேக குற்றச்சாட்டுகள் பதிவு செய்யப்பட்டுள்ளதாக தெரிவிக்கப்படுகிறது.

போராட்டப் பகுதியைச் சுற்றியுள்ள நபர்களும் குப்பைத்தொட்டிகளும் சோதனையிடப்பட்ட போது, முகமூடி பொருட்கள், தாக்குதலுக்குப் பயன்படுத்தக்கூடிய பொருட்கள், எறிகருவிகள் மற்றும் தீப்பொறி சாதனங்கள் பறிமுதல் செய்யப்பட்டுள்ளன. கூட்டத்தை கட்டுப்படுத்தும் நடவடிக்கைகளின் போது சில குழப்பங்கள் ஏற்பட்டதால், போலீசார் தற்காலிகமாக மிளகாய் ஸ்ப்ரே (pepper spray) பயன்படுத்த வேண்டிய நிலை ஏற்பட்டதாகவும் தெரிவிக்கப்பட்டுள்ளது. இதன்போது, லேசர் ஒளி மூலம் ஏழு போலீஸ் அதிகாரிகள் தாக்கப்பட்டதாகவும், அவர்களில் மூவர் உடல்நலக் குறைவு காரணமாக மருத்துவமனையில் பரிசோதனைக்காக அனுமதிக்கப்பட்டதாகவும் பெர்ன் கன்டோனல் போலீசார் தெரிவித்துள்ளனர். இதர காயங்கள் குறித்த தகவல்கள் தற்போது இல்லை என்றும், மேலதிக விசாரணைகள் தொடர்ந்து நடைபெற்று வருவதாகவும் கூறப்பட்டுள்ளது.

இந்த அனுமதியில்லா ஆர்ப்பாட்டத்தின் காரணமாக Bahnhofplatz சுற்றுவட்டாரப் பகுதிகளில் கடும் போக்குவரத்து பாதிப்புகள் ஏற்பட்டன. பல பொது போக்குவரத்து சேவைகள் பல மணி நேரங்களுக்கு நிறுத்தப்பட்டதுடன், தனியார் வாகனங்களுக்கு அந்தப் பகுதி சுமார் மூன்றரை மணி நேரம் முழுவதுமாக மூடப்பட்டிருந்ததாக அதிகாரிகள் தெரிவித்துள்ளனர்.

©Kapo BE