இரவு ரயில் சேவைகளுக்கு நிதியுதவி: சுவிட்சர்லாந்தின் ஐந்து முக்கிய நகரங்கள் ஒன்றிணைவு

பாசல்–மால்மோ இரவு ரயில் சேவைக்கு நிதியுதவி வழங்க மறுத்த நாடாளுமன்றத் தீர்மானத்தைத் தொடர்ந்து, சுவிட்சர்லாந்தின் ஐந்து பெரிய நகரங்கள் இணைந்து சர்வதேச இரவு ரயில் சேவைகளைத் தங்களே நிதியளித்து முன்னெடுக்க தீர்மானித்துள்ளன. இந்த புதிய முயற்சி, சுற்றுச்சூழல் பாதுகாப்பு மற்றும் விமானப் பயணத்திற்கு மாற்றான நிலைத்த போக்குவரத்து என்ற கோணத்தில் முக்கியத்துவம் பெறுகிறது.

ஜெனீவா, லௌசான், சூரிக், பாசல் மற்றும் பெர்ன் ஆகிய நகரங்களின் தேர்ந்தெடுக்கப்பட்ட பிரதிநிதிகள் இந்த கூட்டுத் திட்டத்தில் ஒன்றிணைந்துள்ளனர். கூட்டாட்சி அரசு மானியம் வழங்க மறுக்கும் சர்வதேச இரவு ரயில் வழித்தடங்களுக்கு நகரங்களின் பங்களிப்புடன் நிதி ஏற்பாடு செய்யவேண்டும் என்பதே இந்த முயற்சியின் நோக்கமாகும்.

இந்த திட்டம் குறித்து பேசிய லௌசான் நகர சபை உறுப்பினர் Louis Dana, “இரவு ரயில் சேவைகளுக்கும், பகல் நேர சர்வதேச ரயில் வழித்தடங்களுக்கும் மாற்று நிதி தீர்வுகளை நாங்கள் தேடி வருகிறோம்” என்று தெரிவித்துள்ளார். ஐரோப்பிய நகரங்களுக்கிடையேயான ரயில் இணைப்புகள் வலுப்பெறுவது, குறைந்த கார்பன் உமிழ்வு கொண்ட பயண முறைகளை ஊக்குவிக்கும் என்றும் அவர் கூறினார்.

சுவிட்சர்லாந்தில் ரயில் போக்குவரத்து பாரம்பரியமாக வலுவானதாக இருந்தாலும், சமீப ஆண்டுகளில் சர்வதேச இரவு ரயில் சேவைகளுக்கான கூட்டாட்சி ஆதரவு குறைந்துள்ளது. இதனால், நகரங்களே முன்வந்து இந்த சேவைகளை பாதுகாக்கவும், விரிவுபடுத்தவும் முயற்சிப்பது அரசியல் மற்றும் போக்குவரத்து வட்டாரங்களில் புதிய திருப்பமாக பார்க்கப்படுகிறது.

இந்த நகரங்களின் கூட்டு முயற்சி வெற்றியடைந்தால், எதிர்காலத்தில் ஐரோப்பா முழுவதும் இரவு ரயில் பயணத்திற்கு சுவிட்சர்லாந்து முக்கிய மையமாக மாறும் வாய்ப்பும் இருப்பதாக போக்குவரத்து நிபுணர்கள் தெரிவிக்கின்றனர்.

© KeystoneSDA