2025ல் சூரிச் விமான நிலையத்தில் பயணிகள் எண்ணிக்கையில் புதிய சாதனை

2025ஆம் ஆண்டு சுவிட்சர்லாந்தின் முக்கிய விமான நிலையமான Zurich Airport புதிய பயணிகள் சாதனையை பதிவு செய்துள்ளது. கடந்த ஆண்டு முழுவதும் மொத்தம் 3 கோடி 26 லட்சம் பயணிகள் இந்த விமான நிலையம் வழியாக பயணம் செய்துள்ளனர். இது 2024ஆம் ஆண்டுடன் ஒப்பிடுகையில் 4.5 சதவீத வளர்ச்சியாகும் என விமான நிலைய நிர்வாகம் தெரிவித்துள்ளது.

குறிப்பாக டிசம்பர் மாதத்தில் மட்டும் 25.5 லட்சம் பயணிகள் சூரிச் விமான நிலையத்தை பயன்படுத்தியுள்ளனர். இது முந்தைய ஆண்டின் அதே காலப்பகுதியைவிட 7.3 சதவீத அதிகரிப்பாகும். இந்த எண்ணிக்கையில், 18 லட்சம் பேர் க்ளோட்டன் (Kloten) விமான நிலையத்தில் இருந்து நேரடியாக புறப்பட்டோ அல்லது வந்து சேர்ந்தோ உள்ளனர். மீதமுள்ள 7.5 லட்சம் பேர் இடைநிலைக் பயணிகளாக இருந்துள்ளனர்.

இதற்கு முன் பதிவான அதிகபட்ச பயணிகள் எண்ணிக்கை 2019ஆம் ஆண்டில் 3 கோடி 15 லட்சமாக இருந்தது. அதன் பின்னர் கொரோனா பெருந்தொற்று காரணமாக விமானப் போக்குவரத்து கடுமையாக பாதிக்கப்பட்டது. அதன்பிறகு பயணிகள் எண்ணிக்கை மெதுவாகவே மீண்டும் உயரத் தொடங்கியது. 2025ல் எட்டப்பட்ட இந்த சாதனை, அந்த நீண்ட சரிவுக்குப் பிறகான முழுமையான மீட்பாக பார்க்கப்படுகிறது.

இந்த சாதனை எதிர்பாராத ஒன்றல்ல என்றும் விமான நிலைய நிர்வாகம் குறிப்பிட்டுள்ளது. 2024ஆம் ஆண்டில் ஒவ்வொரு மாதமும் பயணிகள் எண்ணிக்கை தொடர்ந்து உயர்ந்ததையடுத்து, 2025ல் சுமார் 3 கோடி 20 லட்சம் பயணிகளை எட்டுவதே இலக்கு என முன்பே அறிவிக்கப்பட்டிருந்தது. அந்த இலக்கை விட அதிகமான எண்ணிக்கையே இப்போது பதிவாகியுள்ளது.

அதே நேரத்தில், விமான இயக்கங்களின் எண்ணிக்கை 2019 நிலையை முழுமையாக எட்டவில்லை. இருப்பினும், அது அந்த ஆண்டின் 98.1 சதவீதத்தை எட்டியுள்ளதாக தெரிவிக்கப்பட்டுள்ளது. 2025ல் மொத்தம் 2,70,116 விமான இயக்கங்கள் நடைபெற்றுள்ளன. இது 2024ஐ விட 3.5 சதவீத அதிகரிப்பாகும். விமானங்களில் இருக்கை நிரப்பல் விகிதம் 79.8 சதவீதமாக உயர்ந்துள்ளது. இது ஆறு ஆண்டுகளுக்கு முன்பைவிட 1.5 சதவீத புள்ளிகள் அதிகமாகும்.

சரக்கு போக்குவரத்திலும் மிதமான வளர்ச்சி காணப்பட்டுள்ளது. 2025ஆம் ஆண்டில் சூரிச் விமான நிலையம் மொத்தம் 4,40,930 டன் சரக்குகளை கையாள்ந்துள்ளது. இது ஆண்டு அடிப்படையில் 1.1 சதவீத உயர்வாகும். 2019ஆம் ஆண்டுடன் ஒப்பிட்டால், சரக்கு போக்குவரத்து அளவு 97.6 சதவீதத்தில் நிலைத்துள்ளதாக நிர்வாகம் தெரிவித்துள்ளது.

ஐரோப்பாவின் முக்கிய விமான மையங்களில் ஒன்றாக விளங்கும் சூரிச் விமான நிலையம், பயணிகள் மற்றும் சரக்கு போக்குவரத்து இரண்டிலும் தொடர்ந்து வலுவான வளர்ச்சியை காட்டி வருவது, சுவிட்சர்லாந்தின் விமானத் துறையின் நிலைத்த மீட்சியை வெளிப்படுத்துகிறது.

Flughafen Zürich