கிரான்ஸ்-மொன்டானா தீ விபத்து: பாதிக்கப்பட்டவர்களிடம் மன்னிப்பு கேட்ட பார் உரிமையாளர்

சுவிட்சர்லாந்தின் வலைஸ் கன்டோனில் (Valais) உள்ள Crans-Montana பகுதியில் புத்தாண்டு தினம் ஏற்பட்ட கொடூரமான தீ விபத்து, நாட்டையே உலுக்கியுள்ள நிலையில், அந்தச் சம்பவம் நடந்த பார் உரிமையாளர் தனது ஆழ்ந்த வருத்தத்தையும் மன்னிப்பையும் வெளிப்படுத்தியுள்ளார். லெ கான்ஸ்டெல்லேஷன் (Le Constellation) பார் உரிமையாளர்களில் ஒருவரான ஜெசிகா மொரெட்டி, “என் எண்ணங்கள் எப்போதும் பாதிக்கப்பட்டவர்களுடன்தான் இருக்கின்றன. இது கற்பனைக்கே அப்பாற்பட்ட ஒரு பேரழிவு” என்று சுவிஸ் அரசு தொலைக்காட்சி RTS-க்கு வெள்ளிக்கிழமை தெரிவித்தார்.

இந்த தீ விபத்தில் 40 பேர் உயிரிழந்ததுடன், 116 பேர் காயமடைந்துள்ளனர். சம்பவம் தொடர்பான விசாரணையின் ஒரு பகுதியாக, ஜெசிகா மொரெட்டியும் அவரது கணவரும் இணை உரிமையாளருமான ஜாக் மொரெட்டியும், வலைஸ் கன்டோனில் உள்ள Sion நகரில் அதிகாரிகளால் விசாரிக்கப்பட்டனர். விசாரணைக்கு பிறகு பேசிய ஜெசிகா மொரெட்டி, “இந்த சம்பவம் எங்கள் நிறுவனத்தில் நடந்தது. அதற்காக நான் மனப்பூர்வமாக மன்னிப்பு கேட்கிறேன்” என கூறினார்.

விசாரணை முடிவில், ஜாக் மொரெட்டி தற்காலிக காவலில் வைக்கப்பட்டார். ஜெசிகா மொரெட்டி, ஜெனீவாவைச் சேர்ந்த தனது வழக்கறிஞர்களுடன் வெளியேற அனுமதிக்கப்பட்டார். RTS வெளியிட்ட காட்சிகளில் உணர்ச்சிவசப்பட்ட நிலையில் காணப்பட்ட லெ கான்ஸ்டெல்லேஷன் பார் மேலாளர், “அனைத்து பாதிக்கப்பட்டவர்களிடமும், இன்றும் உயிர் போராட்டத்தில் இருப்பவர்களிடமும் நான் மன்னிப்பு கேட்க விரும்புகிறேன்” என்று தெரிவித்தார்.

இந்த தீ விபத்து தொடர்பான விசாரணை தொடர்ந்து நடைபெற்று வரும் நிலையில், பாதுகாப்பு நடைமுறைகள் மற்றும் பொறுப்புகள் குறித்து சுவிட்சர்லாந்து முழுவதும் தீவிர விவாதங்கள் எழுந்துள்ளன. பாதிக்கப்பட்ட குடும்பங்களுக்கு நீதி கிடைக்க வேண்டும் என்பதே பொதுமக்களின் ஒருமித்த எதிர்பார்ப்பாக உள்ளது.

© KeystoneSDA