சுவிஸ் வரி திருப்பிச் செலுத்தல் பெயரில் மோசடி மின்னஞ்சல்கள்: அதிகாரிகள் எச்சரிக்கை

சுவிட்சர்லாந்தின் சுங்க மற்றும் எல்லை பாதுகாப்பு கூட்டாட்சி அலுவலகம் (BAZG) என்ற பெயரில் அனுப்பப்படும் மோசடி மின்னஞ்சல்கள் தற்போது அதிகரித்து வருவதாக அதிகாரிகள் எச்சரிக்கை விடுத்துள்ளனர். இந்த மின்னஞ்சல்களில், சுவிஸ் மதிப்புக் கூட்டு வரி (VAT) திருப்பிச் செலுத்தப்படும் என பொய்யான வாக்குறுதிகள் அளிக்கப்பட்டு, பொதுமக்களிடமிருந்து தனிப்பட்ட தகவல்கள் மற்றும் கிரெடிட் கார்டு விவரங்களை திருட முயற்சிக்கப்படுகின்றது.

இந்த மோசடி முறையில், சமீபத்தில் செலவழித்த அல்லது கொள்வனவில் ஈடுபட்ட விடயங்களுக்கு பல நூறு சுவிஸ் ஃப்ராங்குகள் வரி திருப்பித் தரப்படலாம் என மின்னஞ்சலில் தெரிவிக்கப்படுகிறது. அந்த தொகையைப் பெற, ஒரு இணைய இணைப்பை கிளிக் செய்து விவரங்களை சரிபார்க்க வேண்டும் என கூறப்படுகிறது. அந்த இணைப்பு வழியாக செல்லும் இணையதளம், சுவிஸ் கூட்டாட்சி அரசின் அதிகாரப்பூர்வ வடிவமைப்பைப் போலவே உருவாக்கப்பட்டிருப்பதால், அது நம்பகமானதாக தோன்றுகிறது. அரசின் சின்னம் மற்றும் தலைப்பு பகுதி போன்றவை தவறாக பயன்படுத்தப்பட்டு, உண்மையான அரசு இணையதளம் போல காட்டப்படுகிறது.

அந்த இணையதளத்தில், பயனாளர்களிடம் தனிப்பட்ட தகவல்கள், கிரெடிட் கார்டு விவரங்கள் மற்றும் பாதுகாப்பு உறுதிப்படுத்தலுக்கான ஆறு இலக்க குறியீடு வரை கேட்கப்படுகிறது. இந்த தகவல்களை வழங்கிய பின்னர், மோசடிக்காரர்கள் அவற்றை சட்டவிரோத பரிவர்த்தனைகளுக்கு பயன்படுத்தக்கூடும். குறிப்பாக, இரட்டை அடையாள உறுதிப்படுத்தல் போன்ற பாதுகாப்பு முறைகளை மீறுவதற்காக இந்த குறியீடுகள் பயன்படுத்தப்படுகின்றன என எச்சரிக்கப்படுகிறது.

இதுபோன்ற சந்தேகத்திற்குரிய மின்னஞ்சல்களை பெற்றால், அவற்றை cybercrimepolice.ch என்ற இணையதளத்திற்கு அனுப்பி தகவல் அளிக்க வேண்டும் என அறிவுறுத்தப்பட்டுள்ளது. மேலும், அந்த மின்னஞ்சல்களை புறக்கணித்து ஸ்பாம் அல்லது ஜங்க் கோப்புறையில் நீக்க வேண்டும். மின்னஞ்சல் அல்லது குறுஞ்செய்திகளில் வரும் எந்த இணைப்புகளையும் திறக்கக் கூடாது என்றும், முன் சரிபார்ப்பின்றி எந்தவொரு ரகசிய தகவலையும் வழங்க வேண்டாம் என்றும் அதிகாரிகள் வலியுறுத்துகின்றனர்.

யாராவது தங்களது தகவல்களை ஏற்கனவே வழங்கி விட்டால், உடனடியாக தங்களது வங்கி அல்லது நிதி நிறுவனத்தை தொடர்பு கொண்டு சம்பந்தப்பட்ட கார்டுகளை முடக்க வேண்டும். அதனைத் தொடர்ந்து, உள்ளூர் கன்டோன் போலீசில் முன்பதிவு செய்து புகார் அளிக்கவும் அறிவுறுத்தப்பட்டுள்ளது. இந்த வகை ஆன்லைன் மோசடிகள் அதிகரித்து வரும் நிலையில், பொதுமக்கள் கூடுதல் விழிப்புடன் இருக்க வேண்டும் என சுவிஸ் அதிகாரிகள் கேட்டுக் கொண்டுள்ளனர்.

Cybercrimepolice.ch