பாசெல்-லாண்ட்ஷாஃப்ட் மாகாணத்தில் ஏடிஎம் வெடிவைத்து தகர்ப்பு : குற்றவாளிகள் தப்பியோட்டம்

சுவிட்சர்லாந்தின் பாசெல்-லாண்ட்ஷாஃப்ட் மாகாணத்தில் உள்ள லௌஃபென் நகரில் புதன்கிழமை அதிகாலை வங்கியின் ஏடிஎம் இயந்திரம் வெடிகுண்டு வைத்து தகர்க்கப்பட்ட சம்பவம் பரபரப்பை ஏற்படுத்தியுள்ளது. யாருக்கும் உடல்காயம் ஏதும் ஏற்படவில்லை என்றாலும், கட்டடத்திற்கும் இயந்திரத்திற்கும் பெரும் சேதம் ஏற்பட்டுள்ளது.

பாசெல்-லாண்ட்ஷாஃப்ட் காவல்துறை வெளியிட்டுள்ள தகவலின்படி, நவம்பர் 19, 2025 புதன்கிழமை அதிகாலை 2.45 மணிக்கு சற்று முன்பு நௌஸ்ட்ராஸ்ஸே தெருவில் உள்ள ஒரு வங்கிக் கிளையின் முன்புற அறையில் இருந்த ஏடிஎம் இயந்திரத்தை அடையாளம் தெரியாத குற்றவாளிகள் வெடிவைத்து தகர்த்தனர். அக்கம்பக்கத்தில் வசிப்பவர்கள் பயங்கர சத்தம் கேட்டு உடனடியாக காவல்துறைக்குத் தகவல் தெரிவித்தனர்.

சம்பவ இடத்திற்கு விரைந்து வந்த காவலர்கள், வங்கிக் கிளையின் முன்பகுதி முழுவதும் சிதறிக் கிடப்பதையும் ஏடிஎம் இயந்திரம்  நொறுங்கிப்போயிருப்பதையும் கண்டனர். குற்றவாளிகள் மோட்டார் சைக்கிளில் வந்திருக்கலாம் என சந்தேகிக்கப்படுகிறது. அவர்கள் ரோஷென்ஸ் மற்றும் ரோடெர்ஸ்டார்ஃப் திசையில் விரைந்து சென்றதாகத் தெரிகிறது. எவ்வளவு பணம் கொள்ளையடிக்கப்பட்டது என்பது குறித்து இதுவரை எந்தத் தகவலும் வெளியிடப்படவில்லை.

விசாரணைக்காக வங்கிப் பகுதி பெரிய அளவில் மூடப்பட்டது. லௌஃபென் தீயணைப்புத் துறையினரும் உடனடியாக வந்து பாதுகாப்பு நடவடிக்கைகளில் ஈடுபட்டனர்.

சுவிட்சர்லாந்தில் ஏடிஎம் வெடிவைத்துக் கொள்ளையடிப்பது சமீப ஆண்டுகளில் அதிகரித்து வரும் போக்காக உள்ளது. பெரும்பாலும் வெளிநாட்டுக் கும்பல்களே இதுபோன்ற குற்றங்களில் ஈடுபடுவதாக காவல்துறை சந்தேகிக்கிறது. இந்த வழக்கை சுவிஸ் மத்திய அரசு வழக்கறிஞர் அலுவலகமும் ஃபெட்போல் எனப்படும் மத்திய காவல்துறையும் இணைந்து விசாரிக்கின்றன. வெடிபொருள் தொடர்பான குற்றங்கள் மத்திய அரசு அதிகார வரம்பில் வருவதால், வழக்கை மத்திய வழக்கறிஞர் அலுவலகமே வழிநடத்துகிறது.

யாராவது நௌஸ்ட்ராஸ்ஸே தெரு அல்லது லௌஃபென் ரயில் நிலையப் பகுதியில் சந்தேகத்திற்குரிய நபர்களையோ வாகனங்களையோ பார்த்திருந்தால், லீஸ்டாலில் உள்ள பாசெல்-லாண்ட்ஷாஃப்ட் காவல்துறை மையத்தை  தொடர்பு கொள்ளுமாறு கேட்டுக்கொள்ளப்படுகிறார்கள். இதுபோன்ற சம்பவங்கள் பொது மக்களிடையே அச்சத்தை ஏற்படுத்தி வருவதால், காவல்துறை மிகத் தீவிரமாக விசாரணையை மேற்கொண்டு வருகிறது.

© Kapo Basel-Landschaft