சுவிட்சர்லாந்தில் அதிர்ச்சி: கழிவுநீர் குழியில் விழுந்த 18 மாத குழந்தை – தாயின் வீரத்தால் உயிர் தப்பியது

சுவிட்சர்லாந்தின் ஆர்கோவ் (Aargau) மாநிலத்திலுள்ள ஃபிஸ்லிஸ்பாக் (Fislisbach) நகரில் ஒரு பொது மைதானத்தில், பெரும் துயரத்தைத் தாயின் வீரத்தால் தவிர்க்க முடிந்தது. வெறும் 18 மாதங்கள் வயதான ஒரு சிறுமி, விளையாடிக் கொண்டிருந்தபோது திடீரென  நீர் வெளியேற்றப்படும் குழியில் விழுந்தார்.. அந்த குழி இரண்டு மீட்டருக்கும் மேல் ஆழமாகவும், தண்ணீரால் நிரம்பியிருந்ததுடன், விழுந்த இலைகளால் மறைந்திருந்தது.

20Minutes பத்திரிகையின் தகவலின்படி, அந்த நேரத்தில் வெறும் மூன்று மீட்டர் தூரத்தில் இருந்த சிறுமியின் தாய் உடனடியாக  காப்பாற்றும் முயற்சியில் ஈடுபட்டிருந்தார். “என் குழந்தைகள் மைதானத்தில் விளையாடிக் கொண்டிருந்தனர்,” அருகிலிருந்த ஏழு வயது சிறுவன் சிறுமியை மடியில் தூக்கிக் கொண்டு விளையாடியபோது, நீர் வழிந்தோடும் குழியின் மூடி சரியாக மூடப்படாமல் இருந்தமையால் திடீரென உடைந்து இருவரும் கீழே விழுந்தனர். சிறுவன் வாயிலின் ஓரம் பற்றிக்கொண்ட நிலையில் தப்பித்துக் கொண்டார்; ஆனால் சிறுமி தண்ணீரால் நிரம்பிய ஆழமான குழிக்குள் முழுகினார்.

அந்தக் காட்சியை கண்ட தாய் யோசிக்காமல் குழிக்குள் குதித்தார். “என் மனதில் ஒரே எண்ணம் தான் இருந்தது – என் மகளைக் காப்பாற்ற வேண்டும்,” என அவர் பின்னர் கூறியுள்ளார். இருட்டும் தண்ணீரும் நிரம்பிய குழியில், இரண்டு நிமிடங்களுக்கும் மேலாக தேடியபின், சிறுமியின் வெள்ளை ஜாக்கெட் கையால் தொட்டபோது அவர் பிடித்துக் கொண்டார்.

அனைத்துத் திறனையும் பயன்படுத்தி தாயார் சிறுமியை மேலே இழுத்து வெளியே கொண்டுவந்தார். “அவள் நீல நிறமாக மாறியிருந்தாள், மூச்சே விடவில்லை,” என தாய் நினைவுகூர்ந்தார். அப்போது அருகில் இருந்தோர் உடனடியாக உதவியளித்து, அவசர சேவையினருக்கும் தகவல் அளித்தனர். அவர்களின் உடனடி நடவடிக்கையால் சிறுமி உயிருடன் மீண்டார். தற்போது அவர் மருத்துவமனையில் சிகிச்சை பெற்று வருகிறார், நீண்டகால பாதிப்பு எதுவும் இருக்காது என மருத்துவர்கள் தெரிவித்துள்ளனர்.

இந்த சம்பவம் நகராட்சி நிர்வாகத்தையும் அதிர்ச்சியடையச் செய்துள்ளது. “மூடி ஏன் திறந்து இருந்தது என்பது இன்னும் தெளிவாகத் தெரியவில்லை,” என ஃபிஸ்லிஸ்பாக் நகர சபை உறுப்பினர் கிறிஸ்டோஃப் ஷாட் (Christoph Schott) விளக்கினார். “பொதுவாக அந்த மூடி மிகக் கடினமாக பொருத்தப்பட்டிருக்கும்; அதை திறக்க இரண்டு பெரியவர்கள் தேவைப்படும்,” என்றும் அவர் கூறினார்.

நகராட்சி தற்போது சம்பவத்தின் காரணங்களை ஆராய்ந்து வருவதுடன், குடும்பத்துக்கு தங்களின் ஆழ்ந்த அனுதாபத்தைத் தெரிவித்துள்ளது. “இது எங்களை மிகவும் துயரப்படுத்துகிறது. குடும்பத்துடன் தொடர்ந்து தொடர்பில் இருந்து வருகிறோம்,” என அதிகாரிகள் தெரிவித்தனர். அந்த மண்வெளி தற்போது முழுமையாக மூடப்பட்டு, எதிர்காலத்தில் இதுபோன்ற விபத்துகள் நடைபெறாமல் இருக்க கூடுதல் பாதுகாப்பு நடவடிக்கைகள் பரிசீலிக்கப்படுகின்றன.