சுவிட்சர்லாந்தில் பணியில் ஈடுபடும் வெளிநாடுகளில் தடை செய்யப்பட்ட மருத்துவர்கள்

சுவிட்சர்லாந்தில் தற்போது வெளிநாடுகளில் மருத்துவ அனுமதி ரத்து செய்யப்பட்ட பலர் எந்தத் தடையும் இன்றி பணியாற்றி வருகிறார்கள் என்பதைக் கண்டறிந்துள்ளது ஒரு சர்வதேச ஆய்வு குழு. இந்த ஆய்வின் படி, தாய்நாட்டில் உரிமம் ரத்து செய்யப்பட்ட ஆறு மருத்துவர்கள் சுவிஸ் நாட்டில் பணியில் உள்ளனர். அதில், நோர்வேவில் பெண் நோயாளிகளிடம் பாலியல் வன்முறை செய்த குற்றத்திற்காக தண்டிக்கப்பட்ட ஒருவரும் சூரிக்கில் மருத்துவமனையில் சிகிச்சை வழங்கி வருகிறார்.

இத்தகைய நிலை உருவாகியதற்கான காரணம், சுவிட்சர்லாந்து ஐரோப்பிய ஒன்றியத்தின் எச்சரிக்கை பரிமாற்ற முறைமையில் பங்குகொள்ளாததுதான். அந்த அமைப்பின் கீழ், ஒரு நாட்டில் மருத்துவர்களுக்கு விதிக்கப்பட்ட தடை மற்ற நாடுகளுக்கும் தானாகவே தெரியப்படுத்தப்படும். ஆனால் சுவிஸ் இந்த வலையமைப்பில் சேராததால், இங்கேயுள்ள அதிகாரிகளுக்கும் வெளிநாடுகளின் முடிவுகள் பற்றி தகவல் கிடைப்பதில்லை. அதேபோல், சுவிட்சர்லாந்து எவரின் அனுமதியையும் ரத்து செய்தாலும், அது பிற நாடுகளுக்கு தானாகப் பரவாது.

“ஐரோப்பிய ஒன்றிய எச்சரிக்கை முறைமையுடன் சுவிட்சர்லாந்து இணைந்தால், இப்படியான பிரச்சினைகளை தடுக்க மிகுந்த உதவியாக இருக்கும்,” என்று சுவிஸ் மருத்துவ சங்கத் தலைவர் இவோன் கில்லி தெரிவித்துள்ளார்.

மருத்துவர்கள் மீதான தவறான நடத்தை குறித்த வழக்குகள் பொதுமக்கள் நம்பிக்கையை சிதைக்கும் போது, சுவிஸ் சுகாதார அமைப்பில் இப்படிப்பட்ட குறைபாடு வெளிப்படுவது பெரும் அதிர்ச்சியை ஏற்படுத்தியுள்ளது. நோயாளிகளின் பாதுகாப்பு மற்றும் மருத்துவத் துறையின் நம்பகத்தன்மை தொடர்பாக இது தீவிரமான விவாதத்திற்கு வழிவகுக்கும் வாய்ப்பு உள்ளது.

© KeystoneSDA