ஜெனீவா மைதானத்தில் எலிகள் தொல்லை – புல்வெளி சேதம் தொடர்பில் கவலை

சுவிஸ் நாட்டின் ஜெனீவாவில் உள்ள லா ப்ராய்ல் (La Praille) ஸ்டேடியம், சமீபத்தில் எதிர்பாராத பிரச்சினையுடன் போராடி வருகிறது. நூற்றுக்கணக்கான எலிகள் மைதானத்துக்குள் புகுந்து புல்வெளியையும், மின்கம்பிகளையும் சேதப்படுத்தியதுடன், சுகாதார சிக்கல்களையும் எழுப்பியுள்ளன.

பூச்சி ஒழிப்பு நிபுணர்கள் தற்போது நடவடிக்கையில் ஈடுபட்டு, மைதானத்தையும் அதன் சுற்றுப்புறத்தையும் சுற்றி விஷப் பெட்டிகளை அமைத்துள்ளனர். இந்த எலிகள் ஊடுறுவல், மைதானம் அருகே நடைபெற்று வரும் ரயில் பணிகளோ அல்லது போட்டிகள் முடிந்த பின் சுத்தம் செய்யப்படாமல் எஞ்சும் உணவு கழிவுகளோ காரணமாக இருக்கலாம் என்று சந்தேகிக்கப்படுகிறது.

மைதானத்தை பயன்படுத்தும் செர்வெட் எப்.சி. (Servette FC) அணி மற்றும் அதனுடன் இணைந்துள்ள உணவு வழங்கும் நிறுவனங்கள், சுத்தம் செய்யும் பணிகளை மேம்படுத்துமாறு அதிகாரிகளால் கேட்டுக்கொள்ளப்பட்டுள்ளன.

தோட்டக்காரர்கள் தினமும் காலை இரண்டு மணி நேரம் செலவிட்டு, எலிகள் இரவில் தோண்டிய குழிகளை புல்வெளியில் நிரப்ப வேண்டிய கட்டாயத்தில் உள்ளனர். இதனால், போட்டிகள் நடைபெறும் போது ரசிகர்கள் எலிகளை நேரடியாகக் காணவில்லை என்றாலும், பின்னணியில் நிகழும் சேதங்கள் மிகுந்த சிரமத்தை ஏற்படுத்துகின்றன. குளிர்காலம் நெருங்கியுள்ள நிலையில், மைதான புல்வெளியின் நிலைமை குறித்து பெரும் கவலை எழுந்துள்ளது.

ஜெனீவா நகரின் முக்கிய கால்பந்து மைதானங்களில் ஒன்றான இந்த இடம், உள்ளூர் மட்டுமன்றி சர்வதேச போட்டிகளுக்கும் பயன்படுத்தப்படுகிறது. எனவே, எலிகள் தொல்லை நீண்ட காலம் நீடித்தால், விளையாட்டு தரத்துக்கும், மைதானத்தின் பாதுகாப்புக்கும் தீவிரமான பாதிப்பை ஏற்படுத்தும் அபாயம் இருப்பதாக நிபுணர்கள் எச்சரிக்கின்றனர்.

© WRS