சுவிஸ் அரசுத் தளங்களை தாக்கிய ரஷ்ய ஆதரவு ஹேக்கர்கள் மூவர் அடையாளம்

சுவிஸ் அரசின் அதிகாரப்பூர்வ இணையதளங்களை மீண்டும் மீண்டும் குறிவைத்ததாகக் கூறப்படும் “Noname” எனும் ரஷ்ய ஆதரவு ஹேக்கர் குழுவின் மூன்று முக்கிய உறுப்பினர்கள் தற்போது அடையாளம் காணப்பட்டுள்ளனர்.

இந்த குழு, கடந்த 2023 ஜூன் 7 முதல் 19 வரை, சுவிஸ் பாராளுமன்றத்தின் இணையதளத்துக்கு DDoS தாக்குதல்கள் நடத்தியதாகக் கூறப்படுகிறது.
DDoS (Distributed Denial of Service) என்பது, இணையதளத்தை செயலிழக்கச் செய்ய, ஒரே நேரத்தில் ஆயிரக்கணக்கான இணைய கோரிக்கைகளை அனுப்பி தளத்தை முடக்கும் தாக்குதல் முறையாகும்.

சுவிஸ் பொது வழக்குரைஞர் அலுவலகம் (Bundesanwaltschaft) வெளியிட்ட தகவலின்படி, இந்த மூவரது அடையாளம், யூரோபிய போலீஸ் அமைப்பு (Europol) ஒருங்கிணைத்த சர்வதேச விசாரணையின் மூலம் கண்டறியப்பட்டது.

இதையடுத்து, 2023-ல் ஆரம்பிக்கப்பட்ட அறியப்படாத நபர்களுக்கு எதிரான விசாரணை, இப்போது இந்த மூவரை நோக்கி தெளிவாக விரிவாக்கப்பட்டு, அவர்கள் மீது பிடிவாரண்ட் வெளியிடப்பட்டுள்ளது.

“Noname” குழு, 2022-ம் ஆண்டு மார்சில் உக்ரைனில் ரஷ்யா தொடங்கிய யுத்தத்திற்குப் பிறகு, மேற்கத்திய நாடுகளில் உள்ள பல அரசுத் தளங்கள் மற்றும் அமைப்புகளுக்கு எதிராக DDoS சைபர் தாக்குதல்களை மேற்கொண்டு வந்ததாகவும், சுவிஸ் நாடும் அவற்றில் ஒன்றாக பாதிக்கப்பட்டுள்ளதாகவும் அதிகாரிகள் தெரிவித்துள்ளனர்.

இந்த சம்பவம், சைபர் பாதுகாப்பின் முக்கியத்துவத்தை மீண்டும் ஒருமுறை உணர்த்தி, சர்வதேச மட்டத்தில் ஹேக்கிங் நடவடிக்கைகள் எவ்வளவு தீவிரமாக உள்ளன என்பதையும் வெளிப்படுத்துகிறது.