நியூசாடெல் மாகாணத்தில் மோட்டார் சைக்கிள்களின் தொடர் திருட்டுகள்.!

சுவிட்சர்லாந்தின் நியூஷாடல் மாநிலக் கிரிமினல் காவல்துறை மற்றும் மாநில அரசுத்துறை தலைமையிலான விசாரணையில், ஸ்விட்சர்லாந்தின் 13 கன்டோன்களில் பரவலாக நடைபெற்ற மோட்டார் சைக்கிள்கள் மற்றும் மின்சார சைக்கிள்களின் பாரிய திருட்டு மோசடி வெளிச்சத்துக்கு வந்துள்ளது.

இந்த வழக்கில் தொடர்புடைய இரு சந்தேக நபர்கள் தற்போது விசாரணை காவலில் உள்ளனர். அவர்கள் 2023 மற்றும் 2024 ஆம் ஆண்டுகளில் இந்த திருட்டுகளைச் செய்துள்ளதாகக் குற்றம்சாட்டப்பட்டுள்ளது. மொத்த சேத மதிப்பு 9 லட்சம் (907,000) சுவிஸ் ஃப்ராங்க் என மதிப்பிடப்பட்டுள்ளது. இத்திருட்டுகள் முதன்முதலில் 2023 இல் தொடங்கியதாக நம்பப்படுகிறது. குற்றவாளிகள் மிகவும் சக்திவாய்ந்த, விலைமிக்க வாகனங்களை குறி வைத்தனர். அவை பெரும்பாலும் தனிப்பட்ட நபர்களால் ஆன்லைன் விளம்பர தளங்களில் (Kleinanzeigenplattformen) விற்பனைக்கு வைக்கப்பட்டிருந்தன.

தங்களையே வாடிக்கையாளர்களாக நடித்து, அந்த வாகனங்கள் உள்ள இடங்கள் பற்றிய தகவல்களை அவர்கள் சேகரித்தனர். பின்னர் அந்த வாகனங்களை திருடிச் சென்று, சத்தமின்றி அவற்றை பிரான்சுக்குக் கடத்தி, அங்கு மறுபடியும் விற்றுள்ளனர். இந்த வழக்கில் விசாரணை 2024 ஆண்டு தொடக்கத்தில் Val-de-Ruz பகுதியில் நடந்த கொள்ளைச் சம்பவத்தின் பின் ஆரம்பமானது. இதனை தொடர்ந்து இரு சந்தேக நபர்கள் பிடிபட்டனர். அவர்களின் கைது வழியாக மற்ற அனைத்து சம்பவங்களும் வெளிச்சத்துக்கு வந்தன.

இருவரும் 24 வயதுடையவர்கள் எனவும் அவர்கள் தற்போது பிரான்சில் வசிப்பதாகவும் தெரிவிக்கப்பட்டுள்ளது. அதில் ஒருவர் பிரான்ஸ் நாட்டைச் சேர்ந்தவரும் மற்றொருவர் துர்க்மெனிஸ்தான் நாட்டைச் சேர்ந்தவரும் ஆவார். திருடப்பட்ட வாகனங்களில் 39 மோட்டார் சைக்கிள்களும், 19 மின்சார சைக்கிள்களும் உள்ளன. அவை அனைத்தும் சேர்த்து மதிப்பு சுமார் 907,000 ஃப்ராங்க் என கணக்கிடப்பட்டுள்ளது. மேலதிகமாக, மற்ற பொருட்களுக்கும் சேதம் ஏற்பட்டு அதற்கும் 32,000 ஃப்ராங்குக்கு மேல் செலவாகியுள்ளது.

இவர்கள் மீது மேலும் பல குற்றச்சாட்டுகள் சுமத்தப்பட்டுள்ளன: போதைப்பொருள் சட்ட மீறல், அடையாள திருட்டு, சாலை போக்குவரத்து விதிகள் மீறல் என்பன அதில் அடங்கும். இவர்கள் மீது குற்றவியல் நீதிமன்றத்தில் வழக்கு தொடரப்படுகிறது. மொத்தமாக 13 கன்டோன்களில் இருந்து 65 பேர்கள் புகார் அளித்துள்ளனர். அனைத்து மாநிலங்களிலும் தொடரப்பட்ட இந்த வழக்குகளை ஒருங்கிணைத்து நியூஷாடல் மாநில அரசு மேலாண்மை செய்து வருகிறது.

இந்த வழக்கை விசாரிக்க Neuchâtel மாநிலத்தின் பல காவல்துறை பிரிவுகள் — சொத்துத் திருட்டுகள் தடுப்பு பிரிவு, குற்றவியல் பகுப்பாய்வு பிரிவு மற்றும் தடயவியல் (forensic) பிரிவுகள் — அனைத்தும் பெரும் அளவில் ஈடுபட்டன.

இது சமீப காலத்தில் இடம்பெற்ற வாகனத் திருட்டுகள் தொடர்பான மிகப் பெரிய குற்றச்சம்பவமாகும். பொதுமக்கள் மேலும் அவதானமாக இருக்க வேண்டும் என்பதும், ஆன்லைன் விற்பனை முறைகளில் பாதுகாப்பான செயல்பாடுகளை பின்பற்ற வேண்டிய அவசியம் இருப்பதும் இந்த வழக்கு மூலம் எடுத்துக்காட்டப்படுகிறது.

@Kapo NE