சிரியாவில் வன்முறை அதிகரித்து வருவதாக ஜெனீவாவில் அறிக்கை சிரியாவில் கடந்த 2011ஆம் ஆண்டு முதல் தொடர்ந்து வரும் மோதல்கள் மீண்டும் தீவிரமடையும் அபாயம் ஏற்பட்டுள்ளதாக தெரிவிக்கப்பட்டுள்ளது.

ஜெனீவாவில் உள்ள ஐ.நா மனித உரிமைகள் பேரவையின் சிரியா மீதான விசாரணைக் குழுவின் தலைவர் பாலோ பின்ஹெய்ரோ மேற்படி கருத்தை ஐநா மனித உரிமைகள் பேரவையில் ஆணைக்குழு சமர்ப்பித்த சமீபத்திய அறிக்கையில் தெரிவித்துள்ளார்.

வடகிழக்கு சிரியாவில் குர்திஷ் தலைமையிலான சிரிய ஜனநாயகப் படைகள் ஒருபுறமும் அரசாங்கத் துருப்புக்கள், அரபு பழங்குடியினர் மற்றும் ஈரானிய ஆதரவு போராளிகள் இடையே நடந்த சமீபத்திய சண்டையை பின்ஹெய்ரோ குறிப்பிட்டார்.

அறிக்கையின்படி. அக்டோபர் 7 பயங்கரவாத தாக்குதல் மற்றும் காசா போர் தொடங்கியதில் இருந்து உருவான பதட்டங்களை அடுத்து சிரியாவில் உள்ள இலக்குகளை இஸ்ரேல் அதிகளவில் தாக்கியுள்ளது.

இந்த நடவடிக்கையில் ஈரானிய போராளிகள் தாக்கப்பட்டனர். இவை அமெரிக்க தளங்கள் மீதான தாக்குதல்களுடன் பதிலடி கொடுக்கப்பட்டது. அதன்பின் அமெரிக்க துருப்புக்கள் இராணுவத் தாக்குதல்களை மேற்கொண்டன.

ஜனவரி 1 முதல் ஜூன் 30 வரை நடந்த சம்பவங்களை ஆணையம் குறிப்பிடுகிறது. இந்த காலகட்டத்தில், அமெரிக்கா, ரஷ்யா மற்றும் துருக்கி உட்பட ஆறு நாடுகள் அங்கு ராணுவ ரீதியாக செயல்பட்டன.

வட-மேற்கில், அரசாங்கப் படையினர் சர்வதேச அளவில் தடை செய்யப்பட்ட கொத்துக் குண்டுகளைப் பயன்படுத்தியிருந்தனர். இதன் விளைவாக  குறைந்தது 150 பேர், அவர்களில் பாதி பேர் பெண்கள் மற்றும் குழந்தைகள் கொல்லப்பட்டனர் அல்லது காயமடைந்தனர்.

ஆணைக்குழுவின் கூற்றுப்படி, இது போர்க்குற்றமாக இருக்கலாம். வடகிழக்கில் வான்வழித் தாக்குதலின் போது துருக்கியப் படைகள் மின் உற்பத்தி நிலைய விசையாழிகள் மற்றும் மருத்துவ கட்டிடங்களைத் தாக்கின. இதுவும் சட்டவிரோதமானது.

அரசாங்கம் கைதிகளை சித்திரவதை செய்வதாக ஆணையம் குற்றம் சாட்டுகிறது. குர்திஷ் போராளிகள் தலைமையிலான SDF கிட்டத்தட்ட 30,000 சிறார்களை பல ஆண்டுகளாக பேரழிவுகரமான சூழ்நிலையில் முகாம்களில் வைத்திருப்பதையும், அவர்களின் பெற்றோர்கள் இஸ்லாமிய அரச பயங்கரவாத அமைப்பிற்கு ஆதரவளித்ததாகக் கூறப்படுவதையும் இது கண்டிக்கிறது என அவர் தனது அறிக்கையில் தெரிவித்திருந்தார்.