மிஸ் சுவிஸ் இறுதிப் போட்டியாளர் கொலை வழக்கு: கணவரின் நோக்கம் வெளிச்சம்

சுவிட்சர்லாந்தைச் சேர்ந்த முன்னாள் மிஸ் சுவிஸ் இறுதிப் போட்டியாளர் Kristina Joksimovic கொலை செய்யப்பட்ட வழக்கில், அவரது கணவர் மேற்கொண்ட கொடூரச் செயலுக்கான காரணம் தற்போது வெளிச்சத்திற்கு வந்துள்ளது. 2024ஆம் ஆண்டு நடந்த இந்த சம்பவம் நாடு முழுவதும் அதிர்ச்சியை ஏற்படுத்தியிருந்தது.

விசாரணை தகவல்களின் படி, கணவர் Marc Rieben தனது மனைவியை கொன்ற பின்னர், உடலை துண்டாக்கி அழித்துள்ளதாக கூறப்படுகிறது. இந்த சம்பவம் சுவிட்சர்லாந்து மட்டுமின்றி சர்வதேச அளவிலும் பெரும் அதிர்வுகளை ஏற்படுத்தியது.

2017ஆம் ஆண்டு திருமணம் செய்து கொண்ட இந்த தம்பதியினர் வெளிப்படையாக அமைதியான குடும்ப வாழ்க்கை வாழ்ந்து வந்ததாக அண்டை வீட்டாரும் அறிமுகமானவர்களும் தெரிவித்துள்ளனர். ரீபன் ஒரு பொறுப்பான தந்தை என்றும், சமூக சேவைகளில் ஈடுபட்டவராகவும் கருதப்பட்டிருந்தார். இதனால், இந்த கொலைக்கான காரணம் என்ன என்பது குறித்து நீண்ட காலமாக சந்தேகம் நிலவியது.

சமீபத்தில் தொடங்கவுள்ள விசாரணைக்கு முன்னதாக, பேசல்லாந்து அரசு வழக்கறிஞர் அலுவலகம் தாக்கல் செய்த குற்றப்பத்திரிகையின் மூலம் இந்த சம்பவத்தின் பின்னணி வெளிப்படுத்தப்பட்டுள்ளது. அதன்படி, தம்பதியருக்கிடையில் பிரிவினை தொடர்பான வாக்குவாதம் இந்த கொலையை நோக்கி சென்றதாக தெரிவிக்கப்படுகிறது. குறிப்பாக பிப்ரவரி 13ஆம் தேதி மதிய உணவின்போது, விவாகரத்து நிபந்தனைகள் குறித்து இருவரும் கடுமையாக விவாதித்ததாக கூறப்படுகிறது.

அந்த நேரத்தில், ரீபன் விவாகரத்தை ஏற்க மறுத்ததுடன், குழந்தைகளின் முழு காவல் உரிமையைத் தன்னிடம் வைத்திருக்க வேண்டும் என்று வலியுறுத்தியதாகவும், மனைவிக்கு நிதி ஆதரவு வழங்க மறுத்ததாகவும் தகவல்கள் தெரிவிக்கின்றன. இந்த வாக்குவாதமே பின்னர் வன்முறையாக மாறியதாக விசாரணையாளர்கள் கருதுகின்றனர்.

மேலும், சம்பவத்திற்குப் பிறகு நடந்த செயல்கள் மிகவும் அதிர்ச்சிகரமானவை என கூறப்படுகிறது. புலனாய்வு அதிகாரிகளின் தகவலின்படி, உடலை திட்டமிட்டு சிதைத்தல் போன்ற செயல்கள் மனநலக் கோளாறுகளுடன் தொடர்புடையதாக இருக்கலாம் என நிபுணர்கள் மதிப்பிடுகின்றனர். மேலும், உடலை துண்டாக்கும் போது கூட அவர் தனது கைப்பேசியில் காணொளிகளை பார்த்துக் கொண்டிருந்ததாகவும் விசாரணையில் தெரியவந்துள்ளது.

இந்த வழக்கின் முழுமையான விவரங்கள் தற்போது நீதிமன்றத்தில் ஆய்வு செய்யப்படவுள்ள நிலையில், சம்பவத்தின் துல்லியமான சூழ்நிலைகள் மற்றும் நோக்கங்கள் குறித்து மேலதிக தகவல்கள் விசாரணை நடைபெறும் போது வெளிவரும் என எதிர்பார்க்கப்படுகிறது.