சுவிஸ் ஆல்ப்ஸ் மலைப்பகுதிகளில் உருவாகி வரும் ஆபத்து : விஞ்ஞானிகள் எச்சரிக்கை

கடந்த 60 ஆண்டுகளில் சுவிட்சர்லாந்தின் ஆல்ப்ஸ் மலைப்பகுதிகளில் பனிக்கவசம் கணிசமாக குறைந்து வருவதாக புதிய ஆய்வு ஒன்றில் தெரிவிக்கப்பட்டுள்ளது. அந்த ஆய்வின் படி, ஒவ்வொரு பத்து ஆண்டுகளுக்கும் பனியின் அடர்த்தி சராசரியாக 8 சென்டிமீட்டர் அளவுக்கு குறைந்து வருகிறது — இது காலநிலை மாற்றத்தின் தீவிர விளைவாக விஞ்ஞானிகள் குறிப்பிடுகின்றனர்.

இந்த ஆய்வு, சுவிஸ் பனி மற்றும் பனிச்சரிவு ஆராய்ச்சி நிறுவனம் (SLF) மேற்கொண்டது. னிச்சரிவு ஆராய்ச்சி நிறுவனத்தின் காலநிலை ஆய்வாளர் கிறிஸ்டோஃப் மார்டி கூறுகையில், “முதன்முறையாக நாங்கள் நாடு முழுவதும் மற்றும் பல்வேறு உயரத்திலான பகுதிகளுக்கான பனிக்கவசப் போக்குகளைத் தெளிவாகக் காண முடிந்துள்ளது. இங்கு காலநிலை மாற்றத்தின் விளைவுகள் மிகத் தெளிவாகப் புலப்படுகின்றன” என்றார்.

ஆய்வில் மேலும் குறிப்பிடப்பட்டதாவது, உயரமான மலைப்பகுதிகளுக்குச் செல்லச் செல்ல பனிக்கவசம் குறைவதன் அளவு அதிகரித்துள்ளதாகும். இது, பனிமலைகள் மற்றும் பனிச்சறுக்கு தளங்கள் அமைந்துள்ள பகுதிகளில் சுற்றுலா மற்றும் நீர்வளச் சமநிலைக்கும் பாதிப்பை ஏற்படுத்தும் அபாயம் இருப்பதைச் சுட்டிக்காட்டுகிறது.

சுவிஸ் ஆல்ப்ஸ் மலைத்தொடர் ஐரோப்பாவின் முக்கிய இயற்கை அடையாளங்களில் ஒன்றாகும். ஆனால், வெப்பநிலை தொடர்ந்து உயர்வதால், பனி உருகும் வீதம் ஆண்டுதோறும் அதிகரித்து வருகிறது. இதனால், குளிர்கால விளையாட்டுத் துறையும், மலைப்பகுதிகளில் வாழும் சமூகங்களின் வாழ்க்கைமுறையும் ஆபத்துக்குள்ளாகும் என்ற எச்சரிக்கையும் ஆய்வில் கூறப்பட்டுள்ளது.

விஞ்ஞானிகள் கூறுவதாவது, காலநிலை மாற்றத்தை கட்டுப்படுத்தும் உலகளாவிய முயற்சிகள் உடனடியாக வலுப்படுத்தப்படாவிட்டால், சுவிஸ் ஆல்ப்ஸ் மலைகளின் பனிக்கவசம் வரும் சில தசாப்தங்களில் வரலாற்றிலேயே இல்லாத அளவில் குறைந்து விடும் என்பதாகும்.

© KeystoneSDA