சூரிச் நகரம் கஞ்சா விற்பனை முயற்சியை மேலும் இரண்டு ஆண்டுகள் நீட்டிக்கிறது

சுவிட்சர்லாந்தின் சூரிச் நகராட்சி, கட்டுப்படுத்தப்பட்ட கஞ்சா விற்பனைக்கு அனுமதி வழங்கும் முன்னோடி திட்டத்தை இரண்டு ஆண்டுகள் நீட்டிக்க தீர்மானித்துள்ளது. முதலில் 2026 அக்டோபர் மாதத்தில் முடிவடைய இருந்த இந்த முயற்சி, இப்போது 2028 வரை நீடிக்கவுள்ளது.

“சூரி-கேன்” எனப்படும் இந்த ஆய்வுத் திட்டத்தில் தற்போது 2,300 பேருக்கும் மேற்பட்டவர்கள் பங்கேற்று வருகின்றனர். கருப்புச் சந்தையில் நடைபெறும் சட்டவிரோத கஞ்சா விற்பனையை கட்டுப்படுத்தும் நோக்கத்துடன் இந்த முயற்சி தொடங்கப்பட்டது. சூரிச் நகர சபையின் வேண்டுகோளின்பேரில் திட்டத்தை நீட்டிக்க தீர்மானிக்கப்பட்டதாக நகர அதிகாரிகள் தெரிவித்துள்ளனர். இதற்கான கூடுதல் செலவு 8 லட்சம் ஃப்ராங்குகள் என மதிப்பிடப்பட்டுள்ளது.

இந்த முயற்சியின் மூலம் இதுவரை சுமார் 75 லட்சம் ஃப்ராங்குகள் அளவிற்கு கருப்புச் சந்தை வர்த்தகம் திசை திருப்பப்பட்டதாக அறியப்படுகிறது. மக்களின் உடல் நலம் மற்றும் கருப்புச் சந்தையிலிருந்து வரும் ஆபத்துகளிலிருந்து பாதுகாப்பு என்பதே திட்டத்தின் முக்கிய குறிக்கோள் என அதிகாரிகள் கூறினர். இந்த முயற்சியை சூரிச் பல்கலைக்கழக மனநல மருத்துவமனை (University Psychiatric Clinic of Zurich) கண்காணித்து வருகிறது.

அதேவேளை, 2025 ஜூலை மாதத்தில் அரசு, பங்கேற்பாளர் எண்ணிக்கையை 2,100 இலிருந்து 3,000 ஆக உயர்த்த அனுமதி வழங்கியது. இதன் மூலம், இதுவரை குறைவாக இருந்த பெண்கள் மற்றும் வழக்காக சில நேரங்களில் மட்டுமே பயன்படுத்தும் நபர்களைச் சேர்க்கும் முயற்சி மேற்கொள்ளப்படுகிறது.

சுவிட்சர்லாந்தில் கடந்த சில ஆண்டுகளில் பல நகரங்கள் இதேபோன்ற சோதனை முயற்சிகளை மேற்கொண்டு வருகின்றன. கஞ்சா விற்பனையை முழுமையாக சட்டபூர்வமாக்குவதற்கான சாத்தியம் குறித்து இதுபோன்ற ஆய்வுகள் முக்கிய பங்கு வகிக்கின்றன என நிபுணர்கள் கருதுகின்றனர்.

© KeystoneSDA