பாசல் நகரில் குற்றச்செயல்களை கட்டுப்படுத்த போலீசார் தீவிர சோதனைகள் – 129 பேர் கைது

சுவிஸ் நாட்டின் பாசல்-ஷ்டாட் மாநில காவல்துறை, நகரின் முக்கிய பகுதிகளில் அதிகரித்து வரும் குற்றச்செயல்களை கட்டுப்படுத்தும் நோக்கில் ஆகஸ்ட் இறுதியிலிருந்து சிறப்பு சோதனை நடவடிக்கைகளை மேற்கொண்டு வருகிறது. இதன் ஆரம்ப விளைவுகள் பொதுமக்களின் பாதுகாப்பில் நேர்மறையான தாக்கத்தை ஏற்படுத்தியுள்ளதாக அதிகாரிகள் தெரிவித்துள்ளனர்.

கடந்த ஆகஸ்ட் 27 அன்று வெளியிடப்பட்ட அதிகாரப்பூர்வ அறிவிப்பின் படி, பாசல்-ஷ்டாட் மாநில போலீஸ், மாநில வழக்குரைஞர் அலுவலகம் மற்றும் குடியேற்றத் துறையுடன் இணைந்து Unteres Kleinbasel மற்றும் பாசல் SBB ரயில் நிலையம் பகுதிகளில் வன்முறை, திருட்டு மற்றும் போதைப்பொருள் குற்றச்செயல்களை குறைப்பதற்கான இலக்குடன் தீவிர கண்காணிப்பு நடவடிக்கைகளைத் தொடங்கியது.

இலையுதிர் காலத்தின் தொடக்கத்திலிருந்து மேற்கொள்ளப்பட்ட பல போலீஸ் நடவடிக்கைகளின் மூலம், பொதுமக்கள் வாழும் இடங்களில் குற்றச்செயல்களின் தாக்கத்தை கணிசமாகக் குறைப்பதில் முன்னேற்றம் காணப்பட்டதாக தெரிவிக்கப்பட்டுள்ளது.

இதுவரை மொத்தம் 396 பேரிடம் அடையாள சோதனை மேற்கொள்ளப்பட்டதில், 129 பேர் கைது செய்யப்பட்டுள்ளனர். கைது செய்யப்பட்டவர்களில் 44 பேர் அல்ஜீரியாவைச் சேர்ந்தவர்கள், 21 பேர் மரோக்கோ நாட்டைச் சேர்ந்தவர்கள் மற்றும் 64 பேர் பிற நாட்டைச் சேர்ந்தவர்கள் என கூறப்பட்டுள்ளது.

இவர்களில் சுமார் 75% பேர் குடியேற்றம் மற்றும் ஒருங்கிணைப்பு சட்டம் (AIG) மீறிய குற்றச்சாட்டில் கைது செய்யப்பட்டுள்ளனர். மீதமுள்ளவர்கள் திருட்டு, போதைப்பொருள் கடத்தல் மற்றும் பிற குற்றச்செயல்களுடன் தொடர்புடைய வழக்குகளில் சிக்கியுள்ளனர்.

பாசல் மாநில காவல்துறை, இந்த நடவடிக்கையின் முதல் கட்ட முடிவுகள் மிகவும் உற்சாகமாக உள்ளதாகவும், முக்கிய குற்றப்பகுதிகளில் குற்றச்செயல்கள் குறைந்துள்ளதாகவும் தெரிவித்துள்ளது.

அதிகாரிகள் மேலும், இச்சிறப்பு நடவடிக்கை தொடரும் காலத்திலும் அதன் பின்னரும் இந்த நல்ல விளைவு நீடிக்கும் என நம்பிக்கை தெரிவித்துள்ளார். குளிர்காலம் தொடங்குவதால் வெளிப்புற குற்றச்செயல்கள் இயற்கையாகவே குறையும் என்பது வழக்கமான அனுபவம் என்றும் அவர்கள் குறிப்பிட்டனர்.

© Kapo BL