இரண்டாம் தர ரயில் பெட்டிகளிலும் அமைதிப் பகுதிகள் வேண்டும் – பீல் நகர பெண்ணின் ஆன்லைன் மனு

பேர்ன் கன்டோனில் (Bern) அமைந்துள்ள பீல் (Biel) நகரத்தைச் சேர்ந்த ஒரு பெண், சுவிட்சர்லாந்து ரயில்களில் இரண்டாம் தரப் பயணிகளுக்காகவும் அமைதிப் பகுதிகளை ஏற்படுத்த வேண்டும் எனக் கோரி ஆன்லைன் மனு ஒன்றை தொடங்கியுள்ளார்.

மிர்யாம் வாஹ்லி (Myriam Wahli) என்ற அந்த பெண் இந்த மனுவை தொடங்கி பொதுமக்களின் ஆதரவை திரட்டிவருகிறார். தற்போது சுவிஸ் கூட்டாட்சி ரயில்வே சேவைகளில் அமைதிக்காக ஒதுக்கப்பட்ட பகுதிகள் பெரும்பாலும் முதல் தர பயணிகளுக்காக மட்டுமே உள்ளன. இதன் அவசியத்தை கேள்விக்குள்ளாக்கிய வாஹ்லி, அமைதியான பயண சூழல் என்பது எல்லா பயணிகளுக்கும் சமமாக கிடைக்க வேண்டிய உரிமை என வலியுறுத்தியுள்ளார்.

ஜூரா பகுதியின் பிரெஞ்சு மொழி நாளிதழான “Le Journal du Jura” வெளியிட்ட செய்தியின் படி, ஒலி மாசு என்பது பொதுச் சுகாதாரத்துடன் தொடர்புடைய ஒரு முக்கிய பிரச்சினையாக வாஹ்லி கருதுகிறார். தினமும் சுவிட்சர்லாந்தில் ஒரு மில்லியனுக்கும் அதிகமான மக்கள் ரயில்களைப் பயன்படுத்தி பயணம் செய்கிறார்கள் என்பதால், அமைதியான பயண சூழல் பலருக்கும் முக்கியமாக இருக்கும் என்று அவர் கூறியுள்ளார்.

குறிப்பாக வெளிப்படையாக தெரியாத உடல் அல்லது மனநலக் குறைபாடுகளுடன் வாழும் சிலருக்கு அமைதியான இடங்கள் மிகவும் உதவியாக இருக்கும் என்றும் அவர் விளக்குகிறார். இந்த வகை பயணிகளுக்கு கூட்டம் மற்றும் சத்தம் அதிகமான சூழ்நிலைகள் சிரமத்தை ஏற்படுத்தக்கூடும் என்பதால், இரண்டாம் தர பெட்டிகளிலும் அமைதிப் பகுதிகளை ஏற்படுத்துவது தேவையான மாற்றமாக இருக்கும் என அவர் கருதுகிறார்.

இந்நிலையில், சுவிஸ் கூட்டாட்சி ரயில்வே (SBB) இதுபோன்ற முயற்சி முன்னதாகவே சோதனை செய்யப்பட்டதாக தெரிவித்துள்ளது. 2008 மற்றும் 2009 ஆம் ஆண்டுகளில் இரண்டாம் தர ரயில் பெட்டிகளில் அமைதிப் பகுதிகளை அறிமுகப்படுத்தும் முயற்சி மேற்கொள்ளப்பட்டபோதும், அதற்கு பயணிகளிடையே எதிர்பார்த்த அளவு தேவையோ ஆதரவோ கிடைக்கவில்லை. மேலும், டிக்கெட் பரிசோதனை செய்யும் போது சில இடங்களில் பயணிகளிடையே பதற்ற நிலை உருவானதாலும் அந்த முயற்சி தொடரப்படவில்லை என்று SBB கூறியுள்ளது.

எனினும் தற்போது தொடங்கப்பட்டுள்ள இந்த ஆன்லைன் மனு, பொதுப் போக்குவரத்தில் அமைதியான பயண சூழலை அனைவருக்கும் கிடைக்கச் செய்ய வேண்டும் என்ற விவாதத்தை மீண்டும் முன்வைத்துள்ளது. WRS