சுவிட்சர்லாந்தில் Netflix சந்தா கட்டண உயர்வு – மாதம் இரண்டு ஃபிராங்குகள் கூடுதல்

அமெரிக்க ஸ்ட்ரீமிங் சேவையாகிய Netflix, சுவிட்சர்லாந்தில் தனது சந்தா கட்டணங்களை உடனடியாக உயர்த்தியுள்ளது. புதிய அறிவிப்பின்படி, அனைத்து திட்டங்களிலும் மாதத்திற்கு 2 ஃபிராங்குகள் வரை கட்டணம் அதிகரிக்கப்பட்டுள்ளது.

Netflix வியாழக்கிழமை தனது இணையதளத்தில் வெளியிட்ட தகவலின்படி, அடிப்படை (Basic) சந்தா கட்டணம் இப்போது மாதத்திற்கு 14.90 சுவிஸ் ஃபிராங்குகள் ஆகும். புதிய வாடிக்கையாளர்களுக்கு இந்த கட்டண மாற்றம் உடனடியாக அமலாகும். தற்போதைய வாடிக்கையாளர்களுக்கு, அவர்களின் பில்லிங் சுழற்சியைப் பொருத்து கட்டண உயர்வு படிப்படியாக அமல்படுத்தப்படும்; மாற்றத்துக்கு சுமார் ஒரு மாதம் முன்பே அறிவிக்கப்படும் என நிறுவனம் தெரிவித்துள்ளது.

இந்த உயர்வுக்கான காரணம் குறித்து Netflix தெரிவித்ததாவது, “நாங்கள் எங்கள் உறுப்பினர்களுக்கு வழங்கும் மதிப்பு தொடர்ந்து உயர்ந்து வருவதால், விலைகளும் அவ்வப்போது மாற்றப்படுகின்றன” என்பதாகும்.

சுவிட்சர்லாந்தில் Netflix கடைசியாக விலையை உயர்த்தியது 2024 ஏப்ரல் மாதத்தில்தான். இதேபோல், சமீபத்தில் Disney+ மற்றும் Apple TV+ போன்ற பிற ஸ்ட்ரீமிங் சேவைகளும் தங்களது கட்டணங்களை உயர்த்தியுள்ளன. உற்பத்திச்செலவுகள் உயர்வு மற்றும் உள்ளூர் உள்ளடக்கங்களில் அதிக முதலீடு செய்ய வேண்டிய அவசியம் இதற்குக் காரணமாக கூறப்படுகிறது.

சுவிட்சர்லாந்தின் புதிய திரைப்பட ஊக்கச்சட்டம் படி, நாட்டில் செயல்படும் அனைத்து ஸ்ட்ரீமிங் சேவைகளும் தங்களது வருவாயின் குறைந்தது 4% ஐ சுவிஸ் தயாரிப்புகளில் முதலீடு செய்ய வேண்டும். 2024 ஆம் ஆண்டில் இதன் மூலம் மொத்தமாக 30.1 மில்லியன் ஃபிராங்குகள் சுவிஸ் திரைப்படத் துறைக்கு சென்றதாக கூட்டாட்சி அரசு தெரிவித்துள்ளது.

Netflix தனது சமீபத்திய காலாண்டு அறிக்கையில் வருவாய் மற்றும் லாபத்தில் கணிசமான வளர்ச்சியைப் பதிவுசெய்துள்ளது. கடந்த ஆண்டுடன் ஒப்பிடும்போது வருவாய் 16% அதிகரித்து 11.1 பில்லியன் அமெரிக்க டாலராக உயர்ந்துள்ளது, அதேவேளை லாபம் 45% அதிகரித்து 3.1 பில்லியன் டாலராக சென்றுள்ளது.

இந்த வளர்ச்சிக்கு முக்கிய காரணம் அதிக கட்டணங்கள் மற்றும் விளம்பர வருவாய் உயர்வாகும் என நிறுவனம் குறிப்பிட்டுள்ளது.

Netflix இப்போது தனது சந்தாதாரர்களின் துல்லிய எண்ணிக்கையை வெளியிடவில்லை என்றாலும், 2024 இல் 301.6 மில்லியன் குடும்பங்கள் அதன் சேவைக்கு பதிவு செய்திருந்ததாக முந்தைய அறிக்கையில் தெரிவிக்கப்பட்டது.

© KeystoneSDA