சுவிஸ் மருத்துவமனைகளில் நேரமாற்றத்தின் தாக்கம் : ஆய்வில் வெளியான திடுக்கிடும் தகவல்

சுவிட்சர்லாந்தில் நேர மாற்றம் மருத்துவமனைகளின் பணிச்சுமைக்கு நேரடியாகப் பாதிப்பை ஏற்படுத்துகிறது என புதிய ஆய்வு ஒன்று வெளிப்படுத்தியுள்ளது. சுவிஸ் கூட்டாட்சி புள்ளிவிபர அலுவலகம் (UST) 2011 முதல் 2023 வரை சேகரித்த தகவல்களை பகுப்பாய்வு செய்ததில், கோடை நேரம் (Daylight Saving Time) மற்றும் குளிர்கால நேரம் (Standard Time) மாறிய மறுநாளில் அவசரமாக மருத்துவமனையில் சேர்க்கப்படும் நோயாளிகளின் எண்ணிக்கை வழக்கத்தை விட அதிகரிப்பது உறுதியாகியுள்ளது.

தரவு படி, குளிர்கால நேரத்துக்குச் செல்லும் நாளின் பின்னர் 3.5 சதவீதம் அதிக அவசரச் சேர்த்தல்கள் பதிவாகின்றன. அதே சமயம், கோடை நேரத்துக்கு மாறியதும் இந்த உயர்வு 6.5 சதவீதமாக அதிகரிக்கிறது.

இத்தகைய மாற்றங்கள் மருத்துவமனைகள் கூடுதல் முன்னெச்சரிக்கை நடவடிக்கைகளை எடுக்க வேண்டிய அளவுக்கு பெரிதாக இல்லையென சுவிஸ் கூட்டாட்சி புள்ளிவிபர அலுவலகம் விளக்குகிறது. இருப்பினும், நேர மாற்றம் மனித உடலின் இயல்பான செயற்பாடுகளுக்கும் ஆரோக்கியத்திற்கும் உண்மையான தாக்கத்தை ஏற்படுத்துவதை இது தெளிவுபடுத்துகிறது.

புள்ளிவிபரங்கள் காட்டுவது, 65 வயதிற்குக் குறைந்தவர்களுக்கு நேர மாற்றத்தின் விளைவுகள் சற்று அதிகம். கோடை நேரத்தில் +6% மற்றும் குளிர்கால நேரத்தில் +5.2% அதிக அவசரச் சேர்த்தல்கள் குறைந்த வயதினரிடம் பதிவாகின்றன. அதேசமயம், 65 வயதுக்கு மேற்பட்டவர்களில் இந்த உயர்வு முறையே +5.2% மற்றும் +2.7% ஆகக் குறைவாக இருந்தது.

மேலும், கோடை நேரத்திற்கு மாறியபின் சுழற்சி மற்றும் சுவாச நோய்கள் காரணமாக மருத்துவ அவசர சேவைக்கு வரும் நோயாளிகள் அதிகரிக்கின்றனர். அதற்கு மாறாக, நேர மாற்றம் நடந்தவுடன் விபத்துகள் காரணமாக அவசர சிகிச்சைக்காக வருவோர் குறைவதையும் ஆய்வு காட்டுகிறது.

நேர மாற்றத்துடன் தொடர்புடைய மற்றொரு சுவாரஸ்யமான மாற்றம், அவசரச் சேர்த்தல்களின் நேரத்தில் ஏற்படுகிறது. குளிர்கால நேரத்தில் மாற்றம் நடந்ததும் நோயாளிகள் அதிகமாக வரத் தொடங்கும் உச்சநேரம் நாளில் முன்பாகவே காணப்படுகிறது. ஆனால் கோடை நேரத்தில் மாற்றம் நடந்ததும் அந்த உச்சநேரம் பின்னோக்கி தள்ளப்படுகிறது.

சுவிட்சர்லாந்தில் சராசரியாக தினமும் 1,700 பேருக்கு மேல் அவசரச் சிகிச்சைக்காக மருத்துவமனையில் சேர்க்கப்படுகின்றனர். குளிர்காலங்களில் சேர்க்கை அதிகமாக இருக்கும் நிலையில், வசந்த காலங்களில் அது குறைவாகிறது. வேலை நாட்களில், குறிப்பாக திங்கட்கிழமைகளில், மருத்துவமனைகளின் அவசரச் சேர்த்தல்கள் வார இறுதி மற்றும் பொதுவிடுமுறைகளைவிட சுமார் 20 சதவீதம் அதிகம் உள்ளது என்பது ஆய்வின் கூடுதல் கண்டுபிடிப்பு.

இவ்வாறான புள்ளிவிபரங்கள் நேர மாற்றம் மனிதர்களின் தூக்கச் சுழற்சியை பாதித்து ஆரோக்கியத்தில் தாக்கத்தை ஏற்படுத்தக்கூடும் என்பதை மீண்டும் வலியுறுத்துகின்றன. நேரமாற்றம் குறித்து ஐரோப்பாவிலும் சுவிட்சர்லாந்திலும் கடந்த சில ஆண்டுகளாகவே பரவலான விவாதங்கள் நடைபெற்று வருகின்றன.

© KeystoneSDA