பாசலில் கார் இருக்கையின் கீழ் மறைக்கப்பட்ட 80 ஆயிரம் ஃப்ராங்க் மதிப்புள்ள வைர நகை கைப்பற்றப்பட்டது

சுவிஸ் எல்லை பாதுகாப்பு மற்றும் சுங்கத் துறையின் (UDSC) அதிகாரிகள், பாசல் நகரில் ஒரு வழக்கமான வாகனச் சோதனையின் போது, 80,000 ஃப்ராங்க் மதிப்புள்ள வைர சங்கிலி ஒன்றை கண்டுபிடித்துள்ளனர்.

இந்த சம்பவம் கடந்த செப்டம்பர் 16 ஆம் தேதி நடைபெற்றது. லக்சம்பர்க் நாட்டைச் சேர்ந்த 64 வயது ஆண் ஒருவர் சுவிட்சர்லாந்திற்குள் காரில் நுழைந்தபோது, தன் வசமிருந்த மதிப்புமிக்க நகையை சுங்கத்துறைக்கு அறிவிக்கவில்லை.

சுங்கத் துறை அதிகாரிகள் சந்தேகத்திற்கிடமாக இருந்த வெள்ளை நிற காரை சோதனைக்காக நிறுத்தினர். அதன் பின்புற இருக்கையில் 97 வைர சான்றிதழ்களுடன் கூடிய உறைகள் கண்டுபிடிக்கப்பட்டன. ஆனால் வைரங்கள் எங்கும் காணப்படவில்லை. இதனால் அதிகாரிகள் வாகன ஓட்டுநர் தன் உடலில் அல்லது வாகனத்தின் வேறு இடத்தில் அவற்றை மறைத்து வைத்திருக்கலாம் என்று சந்தேகித்தனர்.

பாசல்-லிஸ்ப்யூசெல் (Basel-Lysbüchel) எல்லைச் சாவடியில் நடத்தப்பட்ட விரிவான சோதனையின் போது, காரின் முன் இருக்கையின் கீழ் ஒரு பெட்டி கண்டுபிடிக்கப்பட்டது. அதில் 97 வைரங்களால் அலங்கரிக்கப்பட்ட ஒரு பொலிவான சங்கிலி இருந்தது.

காரை ஓட்டிய நபர், அந்த நகையை சுவிட்சர்லாந்தில் வசிக்கும் ஒருவருக்காக லக்சம்பர்கில் இருந்து எடுத்துவருவதாக தெரிவித்தார். ஆனால் அவர் உடனடியாக சுங்கக் கட்டணம் மற்றும் அபராதத்தை செலுத்த இயலாமல் இருந்ததால், வைர சங்கிலி தற்காலிகமாக சுங்கத்துறையால் பறிமுதல் செய்யப்பட்டது.

சுங்க விதிமீறல் தொடர்பாக, அந்த நபருக்கு எதிராக குற்றவியல் வழக்கு பதிவு செய்யப்பட்டுள்ளது. அதிகாரிகள் தற்போது வைர நகையின் உரிமையாளரையும், இதன் பின்னணி தொடர்பான விசாரணையையும் முன்னெடுத்து வருகின்றனர்.

© UDSC/Imago-Mandoga Media